उपत्यकाका सार्वजनिक स्थानमा भेला भएर होली खेल्न प्रतिबन्ध
![होली होली](https://www.nepaljapan.com/wp-content/uploads/2018/03/holi.jpg)
कोरोना भाइरस संत्ररमणको जोखिम बढेको भन्दै राजधानी काठमाडौं उपत्यकाका तीन जिल्लाका सार्वजनिक स्थानमा भीडभाड गरी होली खेल्न निषेध गरिएको छ । तीनवटै जिल्ला प्रशासन कार्यालयले भीडभाड गरी होली नखेल्न अपील गरेलगत्तै महानगरीय प्रहरी कार्यालय रानीपोखरीले कोरोना भाइरस महामारीको जोखिम बढेकाले भीडभाड गरी सार्वजनिक स्थानमा होली खेल्न निषेध गरिएको जनाएको हो ।
महानगरीय प्रहरी कार्यालय प्रमुख तथा प्रहरी अतिरिक्त महानिरीक्षक हरिबहादुर पालले जिल्ला प्रशासन कार्यालयहरूको निर्णयलाई थप सहयोग पुग्ने गरी सार्वजनिक स्थानमा होली खेल्न रोक लगाइएको जानकारी दिनुभयो । यो वर्ष फागु पहाड तथा उपत्यकामा चैत १५ र तराईमा १६ गते परेको छ ।
सडक, चोक तथा सार्वजनिक स्थानमा भीड थुपारेर होली पर्व मनाउने, पानी छ्याप्ने, लोला हान्ने र जबर्जस्ती रङ अबिर दल्ने कार्यमा रोक लगाइएको स्पष्ट पार्दै उहाँले सुरक्षित रूपमा होली खेल्न आग्रहसहित सर्वसाधारणको सचेतनाका लागि ‘माइकिङ’ गरिने पनि बताउनुभयो ।
होलीको दिन सुरक्षा व्यवस्थापनका लागि करिब पाँच हजार सुरक्षाकर्मी परिचालन हुने सो कार्यालयले जनाएको छ । विशेष गरी होली पर्वमा ट्राफिक नियमको पालना नगर्ने, मदिरा सेवन गरी सवारी चलाउने, मोटरसाइकलमा हेल्मेट प्रयोग नगर्ने, क्षमताभन्दा बढी यात्रु बोक्ने दुई पाङ्ग्रे सवारीमाथिको कारबाहीलाई सशक्त बनाइने भएको छ ।
प्रतिक्रिया राख्नुहोस्