एसियाली मुलुकहरुमा कोरोना संक्रमण कम रहेको दावी भैरहँदा पूर्वी एशियाली देश जापानमा एकै दिन धेरै मानिसमा कोरोनाभाइरसको सङ्क्रमण भेटिएको छ । जापानमा कोरोनाभाइरस परीक्षण सुविधा विस्तार नगरिएकोले भाइरस फैलिएको हुनसक्ने चिन्ता व्यक्त गरिएको थियो ।
जापानमा मंगलबार दिउँसो १ सय ४१ जनामा कोरोना संक्रमण भएको पुष्टि भएको छ । यो समेत गरेर जापानमा संक्रमितको संख्या कुल २ हजार १ सय २८ पुगेको छ । यसमा क्रुज डायमण्डमा रहेका ७ सय १२ जना यात्रु सामेल छैनन् । यसलाई सामेल गर्ने होभने २ हजार ८ सय ४० भएको छ ।
छिमेकी दक्षिण कोरिया र चीनमा जस्तो जापानमा भाइरसबाट जोगिन धेरै सावधानीका उपायहरू अवलम्बन गरिएको छैन । घरमै बस्न गरिएको अनुरोधलाई धेरै टोक्योवासीहरूले बेवास्ता गरिरहेको पाइएको छ ।
जापानमा कोरोना संक्रमणका कारण प्रख्यात हास्य कलाकार केन शिमुराको मृत्यु भैसकेको छ । यसैबीच जापानी सञ्चारमाध्यमले विदेशी नागरिकहरूलाई देश भित्रिन नदिने घोषणा सरकारले गर्न सक्ने बताएका छन् ।
जापानमा क्रुजमा सवार ११ जनासहित ७० जनाको मृत्यु भएको छ ।
