नेपालको पर्यटनमा पदयात्रा सर्वाधिक महत्वपूर्ण मानिन्छ । धार्मिक, सांस्कृतिक महत्व, ऐतिहासिक क्षेत्रमा गरिने रोमाञ्चक पदयात्रा नेपाललाई विश्वमा चिनाउने बलियो आधार हो ।
नेपालका अनेक पदयात्रा क्षेत्रमध्ये मनाङ र मनास्लु उत्कृष्ट मार्गहरूमध्ये एक मानिन्छन्। यी दुवै क्षेत्रले प्राकृतिक सौन्दर्य, सांस्कृतिक विविधता र साहसिक अनुभवको अनुपम संगम प्रस्तुत गर्दछन्।
गण्डकी प्रदेशमा अवस्थित मनाङ र गोरखा जिल्लामा पर्ने मनास्लु क्षेत्र पदयात्रीहरूका लागि स्वर्ग समान छन्। अन्नपूर्ण पदयात्रा मार्गको एक अभिन्न हिस्सा मनाङ र विश्वको आठौँ अग्लो शिखर मनास्लु (८,१६३ मिटर)को फेदीमा गरिने पदयात्राले नेपालको विविधतालाई स्पष्ट रूपमा झल्काउँछ।
मनाङलाई हिमालय पारिको जिल्ला भनेर चिनिन्छ। यहाँको भूबनोट तिब्बती पठारसँग मिल्दोजुल्दो छ। तिलिचो ताल (विश्वकै उच्च स्थानमा रहेको ताल) र थोराङ ला पास (५,४१६ मिटर) यहाँका मुख्य आकर्षण हुन्।
त्यस्तै जैविक विविधताले भरिपूर्ण मनास्लु क्षेत्र यात्रामा घना जङ्गल, छहरा र गहिरा खोँचहरू देख्न सकिन्छ। ल्हो, सामागाउँ र सामदो जस्ता बस्तीहरूबाट देखिने मनास्लु हिमालको दृश्य अत्यन्तै लोभलाग्दो हुन्छ।
प्रतिक्रिया राख्नुहोस्