खेल

नेदरल्याण्ड्सले दिएको १ सय ३७ रनको लक्ष्य पछ्याउँदै नेपालको आक्रामक ब्याटिङ

काठमाडौंमा सुरु भएको नेपाल, मलेसिया र नेदरल्याण्ड्स सम्मिलित त्रिकोणात्मक टी–२० सिरिजको पहिलो खेल जारी छ । पहिलो खेलमा नेदरल्याण्ड्सले नेपाललाई १३७ रनको लक्ष्य दिएको छ । नेपालले ब्याटिङ गरिरहेको छ ।

कीर्तिपुरस्थित त्रिवि क्रिकेट मैदान मैदानमा टस हारेर ब्याटिङको निम्तो पाएको डच टोलीले निर्धारित २० ओभरमा ४ विकेट गुमाएर १३६ रन बनाएको हो । नेदरल्याण्ड्सको शुरुवात राम्रो थिएन । दोस्रो ओभरको छैटौं बलमा सन्दीप लामिछाने म्याक्स ओ डोडलाई एलबीडब्लू धरापमा पार्दै नेपाललाई पहिलो सफलता दिलाएका थिए ।

तेस्रो नम्बरमा ब्याटिङ गर्न आए बेन कुपरलाई खाता खोल्न नदिई सोमपाल कामीले आउट गरे । तर १२ रन जोड्दा २ विकेट गुमाएको डच टोलीको पारी स्कट एडवार्ड्स र बास डे लिडले सम्हाले र, दुवैले तेस्रो विकेटका लागि ६१ रनको साझेदारी गरे । १४औं ओभरको पाँचौ बलमा डेब्युटान्ट शाहब आलमले एडवार्ड्सको विकेट लिए ।

१७औं ओभरको अन्तिम बलमा सन्दीपले बास डे लिडलाई कुशल भुर्तेलको हातबाट क्याचआउट गराए । शाह आलमले नेदरल्याण्ड्सका सक्ट एडवार्ड्सलाई आरिफ शेखको हातबाट क्याचआउट गराए । उनको यो डेब्यु विकेट समेत हो । एडवार्ड्सले ३१ बल खेल्दै २ चौका र १ छक्का मद्दतमा ३० रन बनाए ।

त्यसपछि कप्तान पिटर सिला र अन्टोनिओस स्टलले पाँचौ विकेटका लागि अविजित ३७ रनको साझेदारी गरे । सिलार २२ र स्टल २० रनमा अविजित रहे ।

बलिङमा नेपालका लागि सन्दीप लामिछाने ४ ओभरमा २२ रन खर्चेर २ विकेट लिए । सोमपाल कामीले ४ ओभरमा १३ रन मात्र खर्चेर १ विकेट तथा स्पिनर शाहब आलमले ४ ओभरमा ४५ रन खर्चेर १ विकेट लिए । करण केसीले ४ ओभरमा २२ र अविनाश बोहराले ४ ओभरमा २५ रन खर्चिएर विकेट लिन सकेनन् ।

ब्याटिङ गरिरहेको नेपालको आक्रामक सुरुवात छ । यो समाचार तयार पार्दासम्म पाँच ओभरको समाप्तिमा विना नोक्सानी ६६ रन बनाएको छ । नेपालका तर्फबाट कुशल भुर्तेल र आशिफ शेखले ओपनिङ ब्याटिङ गरेका छन् ।

सम्बन्धित खबर

Back to top button