पूर्व उपप्रधान तथा गृहमन्त्री एवं राष्ट्रिय राष्ट्रिय स्वतन्त्र पार्टी सभापति रवि लामिछानेका सवारी चालक चितवनको भरतपुर ११ मा रहेको आवासको छतबाट खसेर गम्भीर घाइते हुनुभएको छ ।
जिल्ला प्रहरी कार्यालय चितवनका प्रवक्ता एवम् प्रहरी नायव उपरीक्षक विजयराज पण्डितका अनुसार चालक दिलबहादुर थापा भरतपुर ११ मा रहेको लामिछानेको आवासको छतबाट खसेर घाइते हुनुभएको हो ।
सिन्धुपाल्चोक बाह्रबिसे नगरपालिका – ३ घर भएका ३९ वर्षका चालक थापा घरको तीन तलामाथिको छतमा सुतेका चालक सोमबार बिहान अन्दाजी ४ बजेको समयमा खस्नुभएको हो ।
उहाँको खुट्टा र टाउकोमा गम्भीर चोट लागेको छ । उहाँको भरतपुरस्थित पुरानो मेडिकल कलेजमा उपचार भइरहेको र अवस्था गम्भीर रहेको प्रहरीले जनाएको छ ।
प्रहरी प्रवक्ताका अनुसार घटनास्थलमा चितवन प्रहरी प्रमुख रामेश्वर कार्कीको नेतृत्वमा पुगेको टोलीले अनुसन्धान गरिरहेको छ । घटनामा प्रहरीले अर्का चालकलाई नियन्त्रणमा लिएर सोधपुछ गरेको छ ।
सभापति लामिछाने चितवन –२ मा वैशाख १० गतेको उपनिर्वाचनमा उम्मेदवार हुनुहुन्छ । उहाँ यसअघि पनि यही क्षेत्रबाट निर्वाचित हुनुभएको थियो । अवैध नागरिकताका कारण उहाँको सांसद पद सर्वोच्च अदालतले खारेज गरिदिएका कारण उपनिर्वाचन हुन लागेको हो ।
प्रतिक्रिया राख्नुहोस्