राष्ट्रिय स्वतन्त्र पार्टीका सभापति तथा चितवन क्षेत्र नं. २ को उपनिर्वाचनका उम्मेदवार रवि लामिछानेका सवारी चालक शम्भु (दिलबहादुर) थापा घाइते भएपछि लामिछानेले यस्तो बेलामा राजनीति नगरी घाइतेको स्वास्थ्यलाभको कामना गर्न आग्रह गर्नुभएको छ ।
लामिछानेले ट्वीट गर्दै आफ्ना सहयोगी भाइ छतबाट खसेर गम्भीर घाइते भएका बेला मानवीय सम्वेदनशीलता समेत नदेखाई यसैलाई भजाएर राजनीति नगर्न आग्रह गर्नुभएको छ ।
सभापति लामिछानेले यो दुर्घटनालाई चुनावी मुद्दा बनाउने जमर्को भएको सन्देश दिंदै सकिन्छ भने शम्भुका लागि स्वास्थ्य लाभको कामना गर्नु नसके राजनीतिकरण नगर्न आग्रह गर्नुभएको छ ।
उहाँले लेख्नुभएको छ, “आज विहान प्रिय शम्भु भाइ (मेरो गाडी चालक) छतबाट खसेर दुर्घटनामा पर्नुभयो । पुरानो मेडिकल कलेजमा उहाँ उपचारारत हुनुहून्छ । विहानैदेखि निरन्तर र भरखरै पनि मैले चिकित्सकसंग परामर्श गरेअनुसार भगवानको कृपाले उहाँको स्वाथ्य अवस्था विहानकोभन्दा सुधारिएको छ, स्थिर छ । प्रहरी पनि अनुसन्धानमा छ । यस्तो बेला योभन्दा धेरै मसंग तपाईलाई भन्ने कुनै शब्द छैन ।”
लामिछनेले राजनीतिक प्रतिस्पर्धीहरुलाई संकेत गर्दै भन्नुभएको छ, “म नेताभन्दा पहिले मानिस हुँ । म पनि थाक्छु, गल्छु । मेरा पनि आँखामा आँसु आउँछन् । बिन्ती छ, यस्तो चोट लागेको बेला सहानभूति र प्रार्थनाको साटो नुनचुक बोकेर नआउनुहोला । स्तरहीन बनेर राजनीतिकरण नगर्नुहोला । सक्नुहुन्छ भने मलाई सहने शक्ति मात्रै दिनुहोला । मेरो सहयोगी, मेरो भाइ शम्भु अस्पतालको शैय्यामा संघर्ष गरिरहेको छ । उसका लागि प्रार्थना गरिदिनुहोला, स्वास्थ्यलाभको कामना गरिदिनुहोला । राजनीति गर्न सिङ्गो जीवन छ, यस्तो सम्वेदनशील घडीमा मौका नछोप्नु होला ।”
छतबाट खसेका चालक थापासंगै सुतेका रास्वपा महामन्त्री ढकालका चालक प्रहरी नियन्त्रणमा
प्रतिक्रिया राख्नुहोस्