राजनीति

“जनयुद्धको शुरुआत ६५ जनाबाट भएको थियो”

नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ ले जनयुद्धको शुरुआत ६५ जनाबाट भएको स्मरण गर्दै त्यसको १० वर्षको अवधिमा देशमा राजनीतिक परिवर्तन भएको बताउनुभएको छ ।



अखिल नेपाल शिक्षक सङ्गठनको शैक्षिक अभियान तथा दोस्रो र तेस्रो संयुक्त प्रदेश परिषद्को शनिबार उद्घाटन गर्नुहुँदै उहाँले जनताको एजेण्डा बोकेका कारण आफूहरूलाई जनताको साथ प्राप्त भएको उल्लेख गर्दै सो कुरा बताउनुभएको हो ।

माओवादीप्रति भ्रम फैलाउने काम भइरहेको भन्दै उहाँले कोही भ्रममा पर्न आवश्यक नरहेको पनि बताउनुभयो । माओवादीप्रति जनतामा विश्वास नटुटेको उहाँको भनाइ थियो । अध्यक्षले भन्नुभयो, “केही मानिसले माओवादी सिद्धियो, प्रचण्ड सिद्धियो भनेर भ्रम छर्ने काम गरेका छन् । दिग्भ्रमित पार्ने काम भएको छ । जनतामा त्यस्तो छैन ।”

उहाँले सङ्घीय लोकतान्त्रिक गणतन्त्र आफूहरूको कारणले आएको स्पष्ट पार्नुभयो । अध्यक्ष दाहालले ठूलो सङ्घर्ष र बलिदानपछि बनिएको संविधान र कम्युनिष्ट आन्दोलनको व्यापक ध्रुवीकरण र एकतालाई जनताले गरेको अनुमोदनबाट राजनीतिक स्थिरता प्राप्त हुनेछ भन्ने विश्वास लिएको पनि बताउनुभयो ।

आफूहरू यतिबेला सरकार गठन, पुनःगठनको प्रक्रियामा रहेको उहाँको भनाइ थियो । उहाँले भन्नुभयो, “हिजोमात्रै कर्णालीमा के समस्या थियो, कहाँ गएर टुङ्गियो ? तपाईँहरूले थाहा पाइसक्नुभएको छ । अब अस्तिमात्रै गण्डकी प्रदेशमा अविश्वासको प्रस्ताव दर्ता भएको छ ।”

अध्यक्ष दाहालले भन्नुभयो, “लुम्बिनीमा पनि सरकार परिवर्तनका लागि करिब–करिब बहुमतको हस्ताक्षर सङ्कलन भइसकेको छ । अब केन्द्रमा यो अन्योलता र अराजकताको स्थिति अन्त्य गर्नका लागि हामीले केन्द्रीयस्तरमा पनि लगातार पहल गरेका छौँ । म यहाँबाट त्यही प्रक्रियामा सामेल हुन बैठकमा जाँदै पनि छु ।”

आफूले देशका विभिन्न स्थानमा जनताको अपार माया पाएको उल्लेख गर्दै उहाँले भन्नुभयो, “हाम्रो मुद्दाप्रति जनताको विश्वास र भरोसा टुटेको हो त ? तल जाँदा जनतामा त्यस्तो पाइनँ । किन हाम्रो नेतृत्व हामीकहाँ आउँदैन ? भनेर गुनासो रहेछ ।”

सम्बन्धित खबर

Back to top button