अख्तियार दुरुपयोग अनुसन्धानले पोखरा क्षेत्रीय अन्तर्राष्ट्रिय विमानस्थल निर्माणका क्रममा भएको भ्रष्टाचारको अनुसन्धानपछि तेस्रोपटक थप पूर्वमन्त्री सहित उच्च अधिकारीहरुबिरुद्ध मुद्दा दायर गरेको छ ।
बिहिबार अख्तियारले भ्रष्टाचार गरेको आरोपमा तत्कालीन अर्थमन्त्री ज्ञानेन्द्रबहादुर कार्कीसहित सचिव लगायत १४ जना उच्च पदस्थ अधिकारीहरुविरुद्ध तीन अर्ब ६५ करोड बिगो दाबी मुद्दा दायर गरेको हो ।
अख्तियारको दाबीमा ठेक्का सम्झौतामा भएको व्यवस्था विपरीत ठेकेदारलाई राजश्व छुट दिएर उनीहरूले भ्रष्टाचार गरेको दाबीसहित ३ अर्ब ६२ करोड ५ लाख २२ हजार १६० रुपैयाँ बिगो मागदाबी गरेर आरोपपत्र पेश भएको विशेष अदालतका प्रवक्ता कृष्णशरण लामिछानेले जानकारी दिनुभयो ।
तत्कालीन अर्थमन्त्री कार्कीसहित अर्थसचिव शंकर प्रसाद अधिकारी, तत्कालीन पर्यटन सचिव महेश्वर न्यौपाने, तत्कालीन सहसचिवद्वय सुरेश आचार्य र दुण्डुराज घिमिरे, पूर्वसचिव (तत्कालीन सहसचिव) केवल भण्डारी, नागरिक उड्डयन प्राधिकरणका तत्कालीन महानिर्देशक सञ्जिव गौतम र निवर्तमान महानिर्देशक प्रदीप अधिकारी, उपसचिव युवराज पाण्डे, शाखा अधिकृत उर्मिला भण्डारी, इन्जिनियर योगेश अर्याल विरुद्ध अख्तियारले मुद्दा दायर गरेको हो ।
यसै गरी अख्तियारले चिनियाँ निर्माण कम्पनी सीएएमसी त्यसका अध्यक्ष र परियोजन व्यवस्थापक अनि कम्पनी म्यानेजरलाई समेत मुद्दा चलाएको छ । अख्तियारले गत २१ मंसिरमा पाँचजना मन्त्रीसहितलाई विपक्षी बनाएर भ्रष्टाचार मुद्दा दर्ता गरेको थियो ।
त्यसपछि ८ चैतमा पोखरा विमानस्थल निर्माणमा भएको भ्रष्टाचारविरुद्ध अख्तियारले अर्को मुद्दा दायर गरेको थियो भनेन आज बिहिबार तेस्रो मुद्दा दायर गरेको हो । अख्तियारले पहिलो मुद्दा दायर गर्दा नै अनुसन्धान गर्दै चरणबद्ध रुपमा मुद्दा दायर गर्ने जानकारी दिएको थियो ।
प्रतिक्रिया राख्नुहोस्