गैरआवासीय नेपाली संघ (एनआरएनए) जापानले जापानमा आयोजना हुँदै आएको “नेपाल फेस्टिभल” सम्बन्धमा सामाजिक सञ्जालका विभिन्न माध्यमहरूमा कपोलकल्पित, भ्रामक, तथ्यहीन तथा निराधार सामग्रीहरू प्रकाशित एवं प्रसारित भइरहेकोप्रति गम्भीर आपत्ति जनाएको छ ।
एनआरएनएले एक विज्ञप्ति जारी गरी नेपालको मौलिक कला, संस्कृति, भाषा, पर्यटन, पहिचान तथा जापानस्थित नेपाली समुदायबीच आपसी सद्भाव, सहकार्य र एकताको भावना अभिवृद्धि गर्ने उद्देश्यले सञ्चालन हुँदै आएका कार्यक्रमहरूलाई लक्षित गर्दै अपुष्ट सूचना, भ्रामक टिप्पणी तथा व्यक्तिनिष्ठ आरोप–प्रत्यारोप सार्वजनिक गरिनु अत्यन्त दुःखद र खेदजनक विषय भएको बताएको छ ।
सामाजिक सञ्जाल आधुनिक सञ्चारको प्रभावकारी माध्यम भए तापनि यसको गैरजिम्मेवार तथा दुरुपयोगपूर्ण प्रयोगले व्यक्ति, संस्था र समग्र समुदायमै नकारात्मक असर पर्नेतर्फ सचेत गराउँदै एनआरएनएले जापानले आधिकारिक पुष्टि बिना समाजलाई भ्रमित पार्ने काम नगर्न अनुरोध गरेको छ ।
विज्ञप्तिमा आपसी अविश्वास सिर्जना गर्ने तथा सामाजिक सद्भावमा असर पुर्याउने किसिमका गतिविधिहरूले स्वस्थ समुदाय निर्माणमा बाधा पुग्ने भएकाले यस्ता कार्य नगर्न, नगराउन सम्पूर्णमा हार्दिक आग्रह गरिएको छ ।
एनआएनए जापानका प्रवक्ता रवीन शर्माद्वारा जारी विज्ञप्तिमा लोकतान्त्रिक मूल्य र अभिव्यक्ति स्वतन्त्रताको सम्मान गर्दै हामी सबैले सामाजिक उत्तरदायित्व, सभ्यता र मर्यादालाई समेत आत्मसात गर्नु आवश्यक रहेको औंल्याउँदै तथ्यहीन प्रचार, चरित्रहत्या, भ्रम फैलाउने उद्देश्यले गरिने अभिव्यक्ति र सामाजिक सञ्जालको दुरुपयोग कुनै पनि दृष्टिकोणले उचित मान्न नसकिने बताइएको छ ।
कुनै विषयमा जिज्ञासा, गुनासा वा असमझदारी भए सम्बन्धित आयोजक, संस्था वा जिम्मेवार निकायसँग प्रत्यक्ष सम्पर्क गरी सत्यतथ्य बुझ्न अनुरोध गर्दै अपुष्ट सूचना र अफवाहको पछि नलागी सामाजिक एकता, सद्भाव, पारस्परिक सम्मान तथा सकारात्मक वातावरण कायम राख्न सहयोग पुर्याइदिनुहुन जापानस्थित सम्पूर्ण नेपाली समुदायमा हार्दिक अपिल गरिएको छ ।
प्रतिक्रिया राख्नुहोस्