इरानका दिवंगत सर्वोच्च नेता आयातोल्लाह अली खामेनीको अन्त्येष्टि समारोहमा एक प्रस्तोताले अमेरिकी राष्ट्रपति डोनाल्ड ट्रम्पको मृत्युको सार्वजनिक आह्वान गरेपछि यसको विश्वव्यापी चर्चा भएको छ ।
राजधानी तेहरानमा आइतबार आयोजित अन्त्येष्टिमा लाखौँ शोकाकुल सहभागीहरू उपस्थित रहेका बेला उक्त अभिव्यक्ति दिइएको हो।
अन्त्येष्टि समारोह सञ्चालन गरिरहनुभएका कवि मोहम्मद रसुलीले राष्ट्रपति ट्रम्पलाई लक्षित गर्दै, “संसारको सबैभन्दा दुष्ट व्यक्ति अझै किन जीवित छ?” भन्ने प्रश्न गर्नुभएको थियो।
उहाँको उक्त अभिव्यक्तिपछि उपस्थित भीडले ताली बजाउँदै स्वागत गरेको थियो। त्यसपछि उहाँले “अब यो संसार ट्रम्पका लागि राम्रो स्थान रहेन” भन्नुभएको थियो, जसमा पनि भीडबाट समर्थनजनक प्रतिक्रिया आएको थियो।
उहाँको अभिव्यक्तिसँगै समारोहमा सहभागीहरूले “अमेरिकाको मृत्यु होस्” र “इजरायलको मृत्यु होस्” भन्ने नारासमेत लगाएका थिए। अन्तर्राष्ट्रिय सञ्चारमाध्यमहरूका अनुसार, खामेनीको अन्त्येष्टि समारोहमा प्रस्तोताबाट राष्ट्रपति ट्रम्पको मृत्युको प्रत्यक्ष आह्वान गरिएको यो पहिलो घटना हो।
यसअघि पनि तेहरानका विभिन्न स्थानमा ट्रम्प र इजरायली प्रधानमन्त्री बेन्जामिन नेतान्याहूको हत्या गर्नुपर्ने आशयका पोस्टर तथा भित्तेलेखनहरू देखिएका थिए।
यो घटनालाई इरान र अमेरिका युद्ध अन्त्यका लागि स्थायी समझदारी खोज्दै वार्तामा संलग्न भइरहेका बेला आएको कठोर सन्देशका रूपमा हेरिएको छ। उक्त युद्धका कारण विश्व ऊर्जा आपूर्तिमा समेत व्यापक असर परेको छ।
अन्त्येष्टिमा उच्च राजनीतिक तथा धार्मिक नेतृत्वको उपस्थिति
आइतबार तेहरानस्थित ग्रान्ड मोसल्लामा आयोजित धार्मिक प्रार्थनाको नेतृत्व ९७ वर्षीय वरिष्ठ शिया धर्मगुरु आयातोल्लाह जाफर सोभानीले गर्नुभएको थियो। प्रार्थनामा दिवंगत खामेनी तथा उहाँका स्वर्गीय परिवारजनप्रति श्रद्धाञ्जलि अर्पण गरिएको थियो।
समारोहमा खामेनीका छोरा मसुद, मेइसाम र मुस्तफा सहभागी हुनुका साथै इरानी राष्ट्रपति मसुद पेजेशकियान, संसद्का सभामुख मोहम्मद बाघेर घालिबाफ, इस्लामिक रिभोलुसनरी गार्डका प्रमुख जनरल अहमद वाहिदी तथा कुद्स फोर्सका कमाण्डर इस्माइल कानीको पनि उपस्थिति रहेको थियो।
तर इरानका नयाँ सर्वोच्च नेता आयातोल्लाह मोज्तबा खामेनी भने समारोहमा उपस्थित हुनुभएन। इजरायली हवाई आक्रमणमा घाइते भएपछि उहाँ गोप्य स्थानमा रहेको विश्वास गरिएको छ। इजरायलले उहाँलाई पनि निशाना बनाउने चेतावनी दिइसकेको बताइएको छ।
दोस्रो दिन अन्त्येष्टिमा अझ ठूलो जनसहभागिता
अन्त्येष्टिको दोस्रो दिन आइतबार अघिल्लो दिनको तुलनामा उल्लेखनीय रूपमा ठूलो जनसमूह सहभागी भएको थियो। कालो पोशाकमा सजिएका शोकाकुलहरू खामेनीको सम्मानमा झण्डा र ब्यानर बोकेर अन्त्येष्टि स्थल पुगेका थिए। कतिपय ब्यानरमा राष्ट्रपति ट्रम्पको हत्या गर्नुपर्ने मागसमेत उल्लेख गरिएको थियो।
उता, अमेरिकामा स्वतन्त्रताको २५० औँ वार्षिकोत्सवका अवसरमा आयोजित समारोहलाई सम्बोधन गर्दै राष्ट्रपति ट्रम्पले अमेरिकी सेनाको प्रशंसा गर्नुभएको थियो।
उहाँले “हामीले असाधारण सफलता हासिल गरेका छौँ। भेनेजुएला र इरानलाई हेर्नुहोस्। हामीले उनीहरूको सैन्य क्षमता पूर्ण रूपमा ध्वस्त बनायौँ।” भन्नुभएको थियो।
सोलैमानी हत्यापछि ट्रम्पमाथि सुरक्षा चुनौती
सन् २०२० मा राष्ट्रपति ट्रम्पको आदेशमा इरानको कुद्स फोर्सका तत्कालीन प्रमुख जनरल कासिम सुलेमानी मारिएपछि अमेरिकी सुरक्षा निकायहरूले ट्रम्प तथा प्रशासनका अन्य उच्च अधिकारीमाथि इरानबाट हुनसक्ने सम्भावित खतरामाथि निरन्तर निगरानी गर्दै आएका छन्।
इरानले भने राष्ट्रपति ट्रम्पको हत्या गर्ने कुनै योजना नरहेको दाबी गर्दै आएको छ। यद्यपि कट्टरपन्थी समूहहरूद्वारा प्रकाशित प्रचार सामग्रीहरूमा ट्रम्पलाई लक्षित गरिएको सन्देश बारम्बार सार्वजनिक हुँदै आएका छन्।
युद्धका क्रममा राष्ट्रपति ट्रम्पले पनि इरानको सभ्यतालाई नै ध्वस्त पार्ने चेतावनीसहित कडा अभिव्यक्तिहरू दिनुभएको थियो।
अन्त्येष्टिका कारण अमेरिका–इरान वार्ता स्थगित
गत फेब्रुअरी २८ मा इजरायली हवाई आक्रमणमा ८६ वर्षको उमेरमा मारिनुभएका आयातोल्लाह अली खामेनीको अन्त्येष्टिलाई इरानको धार्मिक शासन व्यवस्था र नयाँ सर्वोच्च नेतृत्वका लागि राजनीतिक रूपमा महत्वपूर्ण क्षणका रूपमा हेरिएको छ।
विश्लेषकहरूका अनुसार इरानले युद्धको स्थायी अन्त्यका लागि अमेरिकासँग वार्ता गरिरहँदा रणनीतिक रूपमा अत्यन्त महत्वपूर्ण हर्मुज जलडमरूमध्यमाथिको आफ्नो प्रभावलाई पनि वार्ताको प्रमुख आधार बनाउने प्रयास गरिरहेको छ। साथै इजरायलबाट पुनः आक्रमण हुन सक्ने सम्भावनाले पनि इरान चिन्तित देखिएको छ।
युद्धका कारण अन्त्येष्टि कार्यक्रम केही समय ढिलाइ गरिएको थियो भने अमेरिका–इरानबीच जारी वार्ता पनि हालका लागि स्थगित अवस्थामा रहेको अन्तर्राष्ट्रिय सञ्चारमाध्यमहरूले जनाएका छन्। (समाचार स्रोत एपी)
प्रतिक्रिया राख्नुहोस्