२०२२ मा हुने विश्वकप फुटबलको छनोट खेल्न प्रशिक्षणमा बोलाइएका खेलाडीहरुको कोरोना परीक्षण गर्दा एकजनामा पोजेटिभ देखिएको छ । अखिल नेपाल फुटबल संघ (एन्फा)ले ३४ जना फुटबलरसहित ५४ जनाको पाटन अस्पतालमा कोरोना भाइरसको पिसिआर टेस्ट गराएकोमा एक जनामा कोरोना भाइरसको संक्रमण देखिएको हो ।
पाटन अस्पतालका निर्देशक डाक्टर बिष्णुप्रसाद शर्माका अनुसार कोरोनाको पोजेटिभ आएका फुटबलरको रिपोर्ट इपिडिमियोलोजी तथा रोग नियन्त्रण महाशाखालाई पठाइएको छ ।
कोरोना लागेका पुष्टि भएकाको सम्पर्कमा आएकालाई निगरानीमा राखिने तयारी गरिएको छ। यस्तै कोरोना लागेका व्यक्तिको स्वास्थ्य जाँच गरेर घरमै आइसोलेसनमा राख्ने वा अस्पताल राख्ने विषयमा रोग नियन्त्रण महाशाखा निर्णय गर्नेछ ।
मंगलबार २३ खेलाडीसहित २९ जनाको परीक्षण गरिएकोमा बिहीबार २२ खेलाडीसहित २८ जनाको रिपोर्ट नेगेटिभ आएको थियो । एन्फाले एक खेलाडीको पुन परीक्षण गर्नुपर्ने मात्र भनेको थियो ।
एन्फाले भदौ १ देखि विश्वकप छनोटको तयारी गर्नका लागि फुटबल टिमका खेलाडी र अफिसियलको कोरोनाको परीक्षण गराएको थियो । यद्यपी फिफाले यो वर्ष विश्वकप छनोट प्रतियोगिताका बाँकी खेल नगर्ने निर्णय गरेसँगै नेपालको तयारी सुरु नै नभइ स्थगित भइसकेको छ ।
प्रतिक्रिया राख्नुहोस्