प्रतिनिधिसभा सदस्य एवं नेपाली कम्युनिष्ट पार्टीका नेता वर्षमान पुनले भोटेकोशी–त्रिशूली बाढीबाट प्रभावित क्षेत्रमा फसेका तथा सम्पर्कविहीन नागरिकको खोजी तथा उद्धार कार्यलाई तीव्रता दिन सरकारको ध्यानाकर्षण गराउनुभएको छ ।
सभाको विशेष समयमा आफ्ना धारणा राख्दै उहाँले केन्द्र, प्रदेश र जिल्ला स्थानीय तहमा सर्वदलीय संयन्त्र बनाउने दलहरूको निर्णय भइसकेकाले प्रधानमन्त्रीले सर्वदलीय बैठक आयोजना गरी यसलाई मूर्तरूप दिनुपर्ने बताउनुभयो ।
सांसद वर्षमान पुनले विपद्पछिको तत्कालीन उद्धार तथा राहतसँगै दीर्घकालीन पुनःस्थापना र विपद् व्यवस्थापनका लागि स्पष्ट रणनीति आवश्यक रहेको बताउनुभयो । उहाँले बाढीका कारण जलविद्युत् आयोजना, सुरुङ तथा विद्युत्गृहमा फसेकाहरूको सम्भव भएसम्म छिटो खोजी तथा उद्धार गर्न, राहत वितरणलाई प्रभावकारी र न्यायोचित बनाउन सभामुखमार्फत सरकारसँग आग्रह गर्नुभयो ।
पूर्व अर्थमन्त्री पुनले राष्ट्रिय हिमालयन जलवायु तथा विपद् कोष स्थापना गर्न, पूर्वसूचना प्रणालीलाई प्रभावकारी बनाउन तथा हिमाली क्षेत्रको नियमित अनुगमन र अध्ययन गर्ने व्यवस्था गर्न पनि माग गर्नुभयो ।
राष्ट्रिय प्रजातन्त्र पार्टीका संसदीय दलका नेता ज्ञानबहादुर शाहीले बाढी प्रभावित क्षेत्रमा अझै केही सुरुङमा मानिस फसेको हुनसक्ने भएकाले ती सुरुङमा तत्काल उद्धार टोली पठाउन सरकारसँग आग्रह गर्नुभयो । उहाँले उपलब्ध साधनस्रोत परिचालन गर्न र उद्धारकार्यमा विज्ञसँग परामर्श गर्न सुझाव दिनुभयो ।
श्रम संस्कृति पार्टीका सांसद अम्बिकादेवी सङ्ग्रौलाले विपद्बाट भएको क्षतिलाई जलवायु न्यायको विषयसँग जोडेर अन्तरराष्ट्रिय मञ्चमा उठाउनुपर्ने बताउनुभयो । उहाँले विपद्का समयमा एकता, सहयोग र ऐक्यबद्धताको खाँचो रहेको औँल्याउनुभयो ।
प्रतिक्रिया राख्नुहोस्