कोरोना संक्रमणका समयमा पनि आफ्नो पेट पाल्न दैनिक ज्याला मजदुरी गर्न बाध्य निम्नवर्गकामाथि कथित उच्च वर्गका मानिसबाट हुने दुव्र्यवहारमा कुनै कमी आएको छैन । पछिल्लो समय जातीय विभेदका घटनाहरु बढ्दै गएका बेला धनुषाको विदेह नगरपालिकामा एक दलित परिवारमाथि निर्घात कुटपिट भएको छ ।
विदेह नगरपालिका वडा नम्बर–३ गोबराहीका स्थानीय सवाई दासका परिवारलाई स्थानीय हरी कुसियैतका छोराहरू रोशन, बिटु र भतिजा दुर्गेश कुसियैतले निर्घात कुटपिट गरेको पीडित परिवारको आरोप छ ।
सोमबार साँझ आफूहरूले ज्यालादारी गरेको पैसा माग्न गएका बेला सामान्य विवाद हुँदा कुसियैत परिवारले सवाई दासको घरमै गई कुटपिट गरेको पीडित रामशरण दासले जानकारी दिएका छन् ।
कुटाइबाट सवाईकी ४५ वर्षीय श्रीमती निलमदेवी दास, उनकी बुहारी, २४ वर्षीय भतिज रामशरण दास र भाइ रामभगत दास घाइते भएका छन् । कुटपिट गर्ने रोशन कुसियैत, बिटु कुसियैत र भतिज दुर्गेश कुसियैत फरार रहेका छन् ।
निर्घात कुटपिटबाट घाइते निलमदेवीलाई उपचारका लागि जनकपुरधामस्थित काव्या अस्पतालमा भर्ना गरिएको छ । कुसियैत परिवार पक्षका पनि तीन जना घाइते भएर अस्पताल भर्ना भएका छन् ।
विदेह नगरपालिकाका प्रमुख बेचन दासले सवाईका छोराहरू कुसियैतको घरमा ज्यालादारी गर्दै आएको र ज्यालादारी बापत बाँकी रहेको पैसा माग्न जाँदा कुटपिट भएको जानकारी दिनुभएको छ ।
कुटपिट गर्नेमाथि कारबाहीका लागि दुहबी गोबराही प्रहरी चौकीमा निवेदनसमेत दिएको पीडित परिवारका सदस्य रामशरण दासले बताए । कुटपिट गर्नेलाई पक्राउ गर्न प्रहरीले आनाकानी गरेको पीडितको आरोप छ ।
प्रतिक्रिया राख्नुहोस्