अमेरिकी राष्ट्रपति डोनाल्ड ट्रम्पले रुस र चीनले इरानलाई सहयोग गरिरहेको भन्ने दाबी अस्वीकार गर्नुभएको छ। उहाँका अनुसार इरानलाई सहयोगमा संलग्न हुँदा रुस र चीनले गुमाउनुपर्ने कुरा धेरै छन्।
स्थानीय समयअनुसार सोमबार उहाँले ‘कट्टर वामपन्थी मूर्ख र सनकीहरू’ले यस्तो दाबी गरिरहेको उल्लेख गर्दै तेहरानलाई सहयोग गर्नमा मस्को र बेइजिङको स्वार्थ नरहेको बताउनुभयो।
आफ्नो सामाजिक सञ्जाल ट्रुथ सोसलमा लेख्दै ट्रम्पले भन्नुभयो, “कट्टर वामपन्थी मूर्ख र सनकीहरूले चीन र रुसले ‘अद्भुत’ इस्लामिक गणतन्त्र इरानलाई सहयोग गरिरहेका छन् भन्ने धेरै टिप्पणी गरेको देखिरहेको छु।
यदि उनीहरूले सहयोग गरिरहेका छन् भने पनि त्यो निकै न्यून स्तरमा हुनुपर्छ। तर, मलाई उनीहरूले कुनै पनि सहयोग गरिरहेका छन् भन्ने विश्वास छैन। उनीहरूले गुमाउनुपर्ने कुरा धेरै छन् र हामीलाई यसबारे थाहा हुने थियो, त्यो पनि निकै छिटो!”
ट्रम्पको यो भनाइ रुसी राष्ट्रपति भ्लादिमिर पुटिन र चिनियाँ राष्ट्रपति सी चिनफिङसँग हालै भएका संवाद तथा भेटघाटका बीच आएको हो। ती छलफलमा ऊर्जा आपूर्ति, आर्थिक सहकार्य र द्विपक्षीय सम्बन्धलगायत विषय समेटिएका थिए।
गत साता ट्रम्पले रुसी राष्ट्रपति पुटिनसँग टेलिफोन वार्ता गर्नुभएको थियो। त्यसपछि उहाँले रुसले अमेरिकी तथा विश्व बजारमा डिजेल इन्धन आपूर्ति गर्ने प्रस्तावित व्यवस्था सार्वजनिक गर्नुभएको थियो।
रुसका राष्ट्रपतीय सहयोगी युरी उशाकोभका अनुसार दुई नेताबीचको टेलिफोन वार्ता डेढ घण्टा चलेको थियो। उहाँले वार्तालाई ‘अत्यन्त सार्थक’ र मैत्रीपूर्ण बताउँदै त्यसमा आर्थिक पहल, ऊर्जा आपूर्ति तथा अन्तर्राष्ट्रिय विषयमा छलफल भएको जानकारी दिनुभएको थियो।
वार्तापछि ट्रम्पले ट्रुथ सोसलमा रुसले तत्काल तीन लाख मेट्रिक टनभन्दा बढी डिजेल इन्धन अमेरिकी तथा विश्व बजारमा आपूर्ति गर्ने, नोभेम्बरमा थप पाँच लाख मेट्रिक टन पठाउने र त्यसपछि तत्कालै थप १० लाख मेट्रिक टन आपूर्ति गर्ने सहमति भएको उल्लेख गर्नुभएको थियो। साथै, रुसी डिजेल प्रशोधन केन्द्रहरूको अवस्थाका आधारमा छोटो समयमै थप ३० लाख मेट्रिक टन डिजेल उपलब्ध गराइने उहाँले बताउनुभएको थियो।
ट्रम्पले प्रस्तावित इन्धन आपूर्तिलाई ऊर्जा मूल्यमा हुने गिरावटसँग पनि जोड्नुभएको छ। उहाँले भन्नुभयो, “हर्मुज जलडमरूमध्यमा हाम्रो पूर्ण नियन्त्रण र रुसी ऊर्जासम्बन्धी यो महत्त्वपूर्ण घोषणाका कारण अमेरिकी तथा विश्व बजारमा डिजेलको मूल्य तीव्र गतिमा र कीर्तिमानी स्तरमा घट्नेछ।”
यसैगरी, चिनियाँ राष्ट्रपति सी चिनफिङसँग ट्रम्पको भेट सीको सेप्टेम्बरमा भएको तीनदिने वासिङ्टन भ्रमणका क्रममा भएको थियो।
ट्रम्पले चिनियाँ समकक्षीसँगको भेटलाई दुई देशबीचको ‘मित्रता, शक्ति र सफलतामा केन्द्रित’ भएको बताउनुभएको थियो। छ महिनाभन्दा कम अवधिमा सी र ट्रम्पबीच भएको यो दोस्रो भेट थियो।
भ्रमणपछि अमेरिका र चीनले एकअर्काको बजारमा ३० अर्ब अमेरिकी डलर मूल्यका गैरसंवेदनशील वस्तुमा थप अनुकूल भन्सार व्यवहार उपलब्ध गराउने सहमति गरेका थिए। साथै, शिखर सम्मेलनका क्रममा उदाउँदा प्रविधिसम्बन्धी नयाँ संवाद संयन्त्र स्थापना गरिएको ह्वाइट हाउसको तथ्यपत्रमा उल्लेख छ।
उक्त तथ्यपत्रअनुसार, दुवै देशले सन् २०२६ मेमा बेइजिङमा भएको शिखर सम्मेलनमा स्थापना गर्ने सहमति गरेका अमेरिका–चीन व्यापार बोर्ड र अमेरिका–चीन लगानी बोर्डलाई पनि सञ्चालनमा ल्याएका छन्।
ह्वाइट हाउसको तथ्यपत्रमा चीनले सन् २०२७ र २०२८ मा कम्तीमा एक करोड मेट्रिक टन अमेरिकी कोइला आयात गर्न पनि सहमति जनाएको उल्लेख छ।
प्रतिक्रिया राख्नुहोस्