जापानको ओकिनावा क्षेत्रमा ३९ वर्षीया महिलाको हत्या गरेको आरोपमा अमेरिकी मरीन सैनिकविरुद्ध अभियोग दर्ता गरिएको छ। घटनाले स्थानीय बासिन्दामा आक्रोश बढाएको छ।

घटनाले जापानमा आक्रोश बढाउनुका साथै प्रधानमन्त्रीबाट कडा प्रतिक्रिया आएको छ । जापानका प्रधानमन्त्रीले घटनालाई ‘जघन्य अपराध’ भन्दै कडा प्रतिक्रिया जनाउनुभएको छ।

जापानी अभियोजनकर्ताहरूले महिलाको हत्या गरेको आशङ्कामा एक अमेरिकी मरीन सैनिकविरुद्ध अभियोग दर्ता गरेका हुन्। नाहा सहरस्थित अदालतका एक प्रवक्ताले एएफपीलाई दिएको जानकारीअनुसार अक्टोबर २५ मा अभियोग दर्ता गरिएको हो।

ती सैनिकमाथि हत्या र लुटपाटको आरोप लगाइएको छ। ‘यो मुद्दामा अक्टोबर २५ मा अभियोग दर्ता गरिएको हो,’ अदालतका प्रवक्ताले सञ्चारमाध्यममा प्रकाशित विवरणको पुष्टि गर्दै भन्नुभयो।

‘योमिउरी सिम्बुन’ अखबारका अनुसार अभियोगपत्रमा उल्लेख भएअनुसार २० वर्षीय ती सैनिकले अक्टोबर ३ मा नाहा सहरकी ३९ वर्षीया महिलालाई एउटा होटलमा टेलिफोनको तारले घाँटी कसेर हत्या गरेको आरोप छ। उनले महिलाको पर्स तथा अन्य सामान रहेको झोला पनि चोरेको आरोप लगाइएको छ। यही आधारमा उनीविरुद्ध लुटपाटको अभियोगसमेत दर्ता गरिएको हो।

ती सैनिकले पक्राउ पर्दा आरोप अस्वीकार गरेका थिए। तर, अनुसन्धानसम्बन्धी स्रोतलाई उद्धृत गर्दै योमिउरी सिम्बुनलगायत सञ्चारमाध्यमले जनाएअनुसार पछिल्लो समय उनले घटनामा आफ्नो संलग्नता रहेको सङ्केत गर्ने खालका बयान दिएका छन्। यद्यपि, अभियोग दर्ता हुनु दोष प्रमाणित हुनु होइन। मुद्दाको अन्तिम निष्कर्ष न्यायिक प्रक्रियाबाट तय हुनेछ।

अमेरिकी सैनिकको तैनाथी र ओकिनावाको असन्तुष्टि

जापानी सञ्चारमाध्यमका अनुसार अभियोग लागेका सैनिकको नाम डेभिन ज्याकोब बालार्ड हो। उनी २० वर्षीय अमेरिकी मरीन लान्स कर्पोरल हुन् र ओकिनावाको जिनोवान सहरस्थित फुतेन्मा अमेरिकी मरीन हवाई अड्डामा तैनाथ थिए।

अनुसन्धानका अनुसार अक्टोबर ३ को बिहान उनी एक महिलासँग नाहास्थित होटलमा प्रवेश गरेका थिए। होटलका कर्मचारीले पछि कोठामा महिलालाई मृत अवस्थामा फेला पारेका थिए। प्रहरीले सोही दिन उनलाई नियन्त्रणमा लिएको थियो।

घटनापछि अमेरिकी सेनाले ओकिनावामा सैनिकको अनुशासन सुदृढ गर्न प्रतिबन्धात्मक कदम चालेको छ। अक्टोबर ९ देखि लागू गरिएको एकमहिने कर्फ्युले सैनिकलाई मध्यरातदेखि बिहान ५ बजेसम्म बाहिर निस्कन रोक लगाएको छ। थप रूपमा केही सैनिकमाथि रक्सी सेवन र रातिको आवागमनसम्बन्धी प्रतिबन्धसमेत लगाइएको समाचार छ।

ओकिनावा लामो समयदेखि अमेरिकी सैनिकको उपस्थितिसँग सम्बन्धित अपराध, ध्वनि प्रदूषण र अन्य सामाजिक समस्याबारे असन्तुष्टि व्यक्त गर्दै आएको क्षेत्र हो।

जापानमा रहेका अमेरिकी सैन्य सुविधामध्ये ठूलो हिस्सा ओकिनावामा केन्द्रित छ र जापानमा तैनाथ करिब ५० हजार अमेरिकी सैनिकमध्ये झन्डै आधा यही क्षेत्रमा रहेको विवरण सार्वजनिक भएका छन्।

सन् १९९५ मा १२ वर्षीया जापानी बालिकामाथि अमेरिकी सैनिकले गरेको सामूहिक बलात्कारको घटनापछि पनि यहाँ व्यापक विरोध भएको थियो।

ओकिनावाका स्थानीय अधिकारीहरूले पछिल्लो घटनापछि अमेरिकी सैनिकको आचरण नियन्त्रण गर्ने व्यवस्था पुनरावलोकन गर्न र यस्ता घटना दोहोरिन नदिन प्रभावकारी कदम चाल्न माग गरेका छन्।

यस घटनाले जापान–अमेरिका सुरक्षा सहकार्यसँगै त्यसको सामाजिक मूल्य र स्थानीय समुदायले बेहोर्नुपरेको भारबारे बहसलाई फेरि तीव्र बनाएको छ।

३७ वर्षमा जापानमा अमेरिकी सेना सम्बद्धविरुद्ध ५ हजार आपराधिक घटना दर्ता