‘वादी समुदायको न्यायिक माग पूरा गर’
![Badi Movement](https://www.nepaljapan.com/wp-content/uploads/2021/02/Badi-Movement-1.jpg)
कृषियोग्य भूमिलगायत शिक्षा, स्वास्थ्य, रोजगारी, खाद्यान्नलगायत माग राखी यही फागुन १० गतेदेखि कर्णाली प्रदेशका मुख्यमन्त्रीको कार्यालय अगाडि सुर्खेत, दैलेख, कालीकोट, अछामलगायतका जिल्लाका वादी समुदायको अनिश्चितकालीन धर्नाप्रति ऐक्यबद्धता र समर्थन जनाउँदै राष्ट्रिय दलित नेटवर्कले माग पूरा गर्न सरकारसँग आग्रह गरेको छ ।
सो संस्थाले एक विज्ञप्ति जारी गरी समस्यालाई पहिचान र प्रतिनिधित्वको सुनिश्चितता हुने गरी वादी समुदायको न्यायिक आन्दोलनसँग तत्काल वार्ता गरी विश्वासको वातावरण बनाउन पनि अनुरोध गरेको छ ।
“दिनभरि आफ्ना कला र व्यवसायबाट काम गरी खानुपर्ने अवस्थाका समुदायले यतिका दिनसम्म धर्नामा बस्दा पनि सरकारको कुनै निकायबाट पनि कुनै पहलकदमी नगरिएको घटनाप्रति गम्भीर ध्यानाकर्षण भएको छ”, विज्ञप्तिमा भनिएको छ । साथै वादी समुदायको आन्दोलनले उठाएका न्यायिक मागको सम्वोधन हुने गरी आवश्यक भूमिका निर्वाह गर्न मुख्यमन्त्री, प्रदेश सरकार, जनप्रतिनिधिलगायत सम्पूर्णमा अपिल गरिएको छ ।
प्रतिक्रिया राख्नुहोस्