रमेश विकल साहित्य प्रतिष्ठान आरुबारीको सहकार्यमा कथा यात्रा समूहले “आख्यान मञ्जिरा” शीर्षकमा वरिष्ठ कथाकार रमेश विकल सहित उहाँका चार पुस्ताहरूको कथामाथि विमर्श कार्यक्रम सञ्चालन गरेको छ ।
फागुन ३० गते शनिबा रमेश विकल साहित्य प्रतिष्ठानका पदाधिकारीहरु र केही स्थानिय कथाकारहरुको बीचमा सञ्चालन भएको उक्त कार्यक्रममा कथा यात्रा समूहका सदस्यहरूले विभिन्न विषयमा समीक्षात्मक प्रस्तुती राख्नुभएको थियो ।
रमेश विकलका कथाकारितामाथि “नयाँ सडकको गीतमा गुञ्जिएको मानवतावादी चिन्तन” शीर्षकमा पवित्रा अधिकारीले एवम् “भ्वाइलेन र भाउजू” शीर्षकमा विश्व कुइकेलले प्रस्तुति राख्नुभयो ।
यस्तै रमेश विकलका छोरा एवम् गोरखापत्र संस्थानका पूर्व अध्यक्ष कथाकार विजय चालिसेमाथि प्रमोद प्याकुरेलले र अर्का छोरा महेन्द्र चालिसेमाथि “अमूर्तताको अस्तित्वमा महेन्द्र चालिसे” शीर्षकमा दीपक लोहनीले प्रस्तुती राख्नुभयो ।
यस्तै नातिपुस्ते कथाकार आलोक चालिसेमाथि हरिश कल्पित एवम् विकलकी पनातिनी आयुषा चालिसेको कथाकारितामाथि डा. हिमलाल श्रेष्ठ र कुमार काफ्लेले प्रस्तुति राख्नुभएको थियो ।
कथा साहित्यमाथिको सिर्जनात्मक कदमको रूपमा यस विमर्श कार्यक्रममा कथा सिद्धान्त र विकलको साहित्यिक विरासतको मात्र चर्चा नगरी पुस्तान्तरणसँगै कथ्य सोच्ने शैलीमा आएको परिवर्तनका विषयमा समेत चर्चा भएको थियो ।
सोही कार्यक्रममा सातजना कथाकारहरूले तयार गरेको समीक्षात्मक पुस्तिका हस्तान्तरण गरिएको थियो भने सोको क्रममा कथा यात्रा समूह र प्रतिष्ठानका वीच आख्यान मञ्जिरा कार्यक्रमलाई निरन्तरता दिने सहमति समेत भएको प्रतिष्ठानका सचिव आलोक चालिसेले बताएका छन्।
प्रतिक्रिया राख्नुहोस्