विश्वभर महामारी फैलाइरहेको कोरोना भाइरस (कोभिड १९)को संक्रमणबाट बेलायती प्रधानमन्त्री बोरिस जोनसन पनि ग्रस्त भएको त्यहाँको प्रधानमन्त्री कार्यालयले एक विज्ञप्तिमार्फत जनाएको छ । बिरामी भए पनि उहाँले नै सरकारको नेतृत्व गरेर यो विपत्को सामना गर्ने विज्ञप्तिमा बताइएको छ ।
प्रधानमन्त्रीको सम्पर्कमा आएका कति मन्त्री एवम् अधिकारीहरू अब एक्लिएर बस्नुपर्ने हो भन्नेबारे अझै स्पष्ट भइसकेको छैन । सरकारका मुख्य वैज्ञानिक र यो महामारीसँग जुझ्ने सरकारका विभिन्न प्रयासमा नेतृत्वदायी भूमिकामा खटिएका मानिसहरूसँग जोनसन सम्पर्कमा रहनुभएको थियो ।
बिहीवार जोनसन यो महामारीसँग जुझ्न खटिएका मानिसहरूप्रति सम्मान दर्शाउन सार्वजनिक रूपमा उपस्थित हुनुका साथै गत साताको बिहीवारसम्म जोनसन पत्रकार सम्मेलनमा प्रत्यक्ष उपस्थित भैरहनुभएको थियो । त्यसबेला उहाँ यस प्रयासमा खटिएका अन्य मानिसहरूबाट दुई मिटरभन्दा कमको दूरीमा रहनुभएको थियो ।
जोनसनले आफूलाई कोरोना भाइरसका मध्यम खालका लक्षणहरू देखिएको र डाउनिङ्ग स्ट्रीटमै एक्लिएर बस्ने बताउनुभएको छ । बेलायतका प्रमुख स्वास्थ्य अधिकारी प्राध्यापक क्रिस ह्विटीको सल्लाहमा उहाँको कोरोनाभाइरस परीक्षण गरिएको थियो ।
प्रधानमन्त्री जोनसनले समेत यसबारे एउटा भिडिओ ट्विट गर्दै एकसाथ भाइरसलाई परास्त गर्ने बताउनुभएको छ । उहाँको जाँच डाउनिङ्ग स्ट्रीटमै राष्ट्रिय स्वास्थ्य सेवा एनएचएसका कर्मचारीहरूले गरेका थिए ।
दुई दिनअघि ब्रिटेनका राजकुमार चार्ल्सलाई कोरोनाभाइरस सङ्क्रमण भएको उनको औपचारिक निवास क्ल्यारन्स हाउसले जनाएको थियो ।
बेलायतभरि ११ हजार ६ सय जनाभन्दा बढी कोरोनाभाइरसका घटना पुष्टि भएकामा हालसम्म ५७८ जनाले ज्यान गुमाएका छन् ।
प्रतिक्रिया राख्नुहोस्