राजनीति

लकडाउन जेठ २० गतेसम्म लम्ब्याउने निर्णय

मुलुकमा कोरोना संक्रमितको संख्या बढ्दै गएको र संक्रमितको मृत्यु समेत हुन थालेपछि सरकारले लकडाउनलाई अर्को दुई साता बढाउने निर्णय गरेको छ । आइतबार बसेको मन्त्रिपरिषद् बैठकले जेठ २० गतेसम्म लम्ब्याउने निर्णय गरेको हो ।

यसअघि आइतबार नै बसेको कोभिड–१९ सङ्क्रमण रोकथाम तथा नियन्त्रण उच्चस्तरीय समन्वय समितिको बैठकले लकडाउन(को समय थप गर्न सरकारलाई सिफारिस गरेको थियो । उपप्रधान तथा रक्षामन्त्री ईश्वर पोखरेल संयोजक रहनुभएको उक्त समितिको प्रधानमन्त्री तथा मन्त्रिपरिषद्को कार्यालय सिंहदरबारमा बसेको बैठकले वर्तमान अवस्थामा बन्दाबन्दी नै प्रभावकारी माध्यम भएकाले बढाउनुपर्ने निष्कर्षसहित सरकारलाई सिफारिस गरेको हो ।

समितिको निर्णयबारे जानकारी दिँदै समितिका सदस्य–सचिव तथा प्रधानमन्त्री कार्यालयका सचिव नारायणप्रसाद बिडारीले कोभिड–१९ कल्पनै नहुने गरी बढ्ने अवस्था रहेकामा बन्दाबन्दीकै कारण सङ्क्रमण रोक्न सफल भएकाले थप गर्नु नै उपयुक्त र सही छ भन्ने निष्कर्ष समितिको रहेको बताउनुभयो ।

बैठकमा विभिन्न क्षेत्रमा रहेको क्वारेन्टाइनलाई थप व्यवस्थित बनाउँदै मापदण्ड नपुगेकालाई पनि पुर्‍याउने र आवश्यक रकम व्यवस्थापन गर्ने निर्णय पनि समितिले गरेको छ । यस्तै बन्दाबन्दी कार्यान्वयन र मानिसको आवागमन रोक्न सुरक्षा व्यवस्था कडा बनाउने तथा स्वास्थ्यकर्मीको मनोबल उच्च बनाउने पनि समितिले निर्णय गरेको छ । अत्यावश्यक वस्तुको कमी हुन नदिने र आपूर्तिको बन्दोबस्त मिलाउने निर्णय पनि समितिले गरेको बिडारीले बताउनुभयो ।

त्यस्तै बैठकमा विदेशमा रहेका नेपालीलाई ल्याउने विषयमा समेत गम्भीर छलफल भएको थियो । छलफलले निष्कर्ष निकाल्न भने नसकेको छलफलमा सहभागी स्वास्थ्य मन्त्रालयका एक अधिकारीले जानकारी दिनुभयो । उहाँका अनुसार स्वास्थ्य मन्त्रालयले क्वारेन्टाइन र आइसोलेशनको आवश्यक व्यवस्थापन नहुँदासम्म ल्याउन नहुने सुझाव प्रस्तुत गरेको थियो ।

सम्बन्धित खबर

Back to top button