विश्वकप फुटबल २०२६ मा इजिप्टले अस्ट्रेलियालाई पेनाल्टी सुटआउटमा ४–२ ले पराजित गर्दै पहिलो पटक विश्वकपको नकआउट चरणमा जित दर्ता गरेको छ। अब इजिप्टले सेमिफाइनल प्रवेशका लागि साविक विश्वविजेता अर्जेन्टिनासँग प्रतिस्पर्धा गर्नेछ।
निर्धारित ९० मिनेटको खेल १–१ को बराबरीमा सकिएको थियो। अतिरिक्त समयमा पनि दुवै टोलीले गोल गर्न नसकेपछि खेलको निर्णय पेनाल्टी सुटआउटबाट गरिएको थियो। इजिप्टका होसम अब्डेलमागुइडले निर्णायक पेनाल्टीलाई गोलमा परिणत गर्दै टोलीलाई ऐतिहासिक जित दिलाउनुभयो।
इजिप्टका लागि पेनाल्टीमा मोहम्मद सोबर, रामी राविया, कप्तान मोहम्मद सलाह र अब्डेलमागुइडले गोल गर्नुभयो। अस्ट्रेलियाले भने सुरुमै लय गुमायो।
पहिलो पेनाल्टी प्रहारकर्ता ह्यारी साउटरको प्रहार बारमाथिबाट बाहिरिएपछि दबाबमा परेको टोलीका १८ वर्षीय लुकास हेरिङटनको अर्को प्रहार गोलपोस्टमा लागेर फर्कियो। त्यसपछि अब्डेलमागुइडले विजयी गोल गर्दै इजिप्टका समर्थकलाई उत्सव मनाउने अवसर दिलाउनुभयो।
पेनाल्टी सुटआउटका लागि अतिरिक्त समयको अन्तिम क्षणमा अनुभवी गोलरक्षक म्याथ्यु रायनलाई मैदानमा उतारे पनि अस्ट्रेलियाको योजना सफल हुन सकेन। उनले इजिप्टका कुनै पनि पेनाल्टी रोक्न सकेनन्।
खेलको १३औँ मिनेटमा इमान असाउरले हेडमार्फत गोल गर्दै इजिप्टलाई अग्रता दिलाउनुभएको थियो। तर दोस्रो हाफको ५५औँ मिनेटमा आइडेन ओ’निलको फ्रिकिक क्लियर गर्ने क्रममा डिफेन्डर मोहम्मद हानीबाट आत्मघाती गोल भएपछि खेल बराबरीमा पुगेको थियो।
यो आत्मघाती गोलसँगै हानी एउटै विश्वकप संस्करणमा दुई आत्मघाती गोल गर्ने पहिलो खेलाडी बनेका छन्। यसअघि उनले समूह चरणमा बेल्जियमविरुद्ध पनि आफ्नै पोस्टमा गोल गर्नुभएको थियो।
यो जितसँगै इजिप्टले विश्वकपमा खेलेका चार नकआउट खेलमध्ये पहिलो जित हात पार्यो। यसअघि उसले नकआउट चरणमा कहिल्यै जित निकाल्न सकेको थिएन। अर्कोतर्फ, अस्ट्रेलियाको नकआउट चरणको निराशा भने कायमै रह्यो।
उसले खेलेका तीनवटै विश्वकप नकआउट खेलमा हार बेहोरेको छ। अझ रोचक तथ्य के छ भने नकआउट चरणमा अस्ट्रेलियाले गरेका दुवै गोल विपक्षी टोलीका आत्मघाती गोलका कारण सम्भव भएका थिए।
अब सबैको ध्यान क्वार्टरफाइनलमा हुने अर्जेन्टिना–इजिप्ट भिडन्तमा केन्द्रित हुनेछ। एकातिर दुई दशकदेखि विश्व फुटबलमा चम्किरहेका लियोनल मेस्सी छन् भने अर्कोतिर अफ्रिकी फुटबलका सबैभन्दा प्रभावशाली खेलाडीमध्ये एक मोहम्मद सलाह।
यी दुई सुपरस्टारबीचको सम्भावित प्रतिस्पर्धाले विश्वभरका फुटबल समर्थकको ध्यान तानेको छ। ३४ वर्षीय सलाहले ऐतिहासिक जितपछि यो आफ्नो खेल जीवनकै सबैभन्दा विशेष दिनहरूमध्ये एक भएको बताउनुभयो।
साथै, उहाँ इजिप्टका सर्वकालीन सर्वाधिक गोलकर्ता तथा वर्तमान प्रशिक्षक होम हसनको ६९ गोलको कीर्तिमानभन्दा अब केवल एक गोलले मात्र पछाडि हुनुहुन्छ।
खेल विश्लेषकहरूका अनुसार अर्जेन्टिनाविरुद्ध इजिप्टलाई स्पष्ट रूपमा कमजोर टोली मानिए पनि पछिल्ला प्रदर्शनले उसलाई खतरनाक प्रतिस्पर्धीका रूपमा स्थापित गरिसकेको छ।
अनुशासित रक्षापंक्ति, तीव्र प्रतिआक्रमण र सलाहको अनुभव इजिप्टका सबैभन्दा बलिया हतियार हुन्। यदि इजिप्टले अर्जेन्टिनालाई स्तब्ध पार्न सफल भयो भने त्यो अफ्रिकी फुटबलकै सबैभन्दा ठूलो उपलब्धिमध्ये एक हुनेछ र विश्वकप इतिहासमा अर्को अविस्मरणीय अध्याय थपिनेछ।
प्रतिक्रिया राख्नुहोस्