फ्रान्सका स्टार स्ट्राइकर किलियन एम्बाप्पेले फिफा विश्वकप २०२६ मा १० गोल गर्दै विश्वकप इतिहासमा आफ्नो कुल गोल सङ्ख्या २२ पुर्याउनुभएको छ।
सन् २०१८ मा चार, २०२२ मा आठ र २०२६ मा १० गोल गर्दै उहाँले केवल २२ खेलमै विश्वकपका सर्वाधिक गोलकर्ताको कीर्तिमान आफ्नो नाममा लेखाउनुभएको हो।
प्रतिखेल लगभग एक गोलको औसत कायम गर्न सफल एम्बाप्पेले जर्मनीका मिरोस्लाभ क्लोजको १६ गोलको दशकौँ पुरानो कीर्तिमानलाई मात्र होइन, यसअघि शीर्ष स्थानमा पुग्नुभएका लियोनल मेसीलाई समेत पछि पार्नुभएको छ।
अर्जेन्टिनाका कप्तान लियोनल मेसी भने ३३ विश्वकप खेलमा २१ गोल गर्दै दोस्रो स्थानमा रहनुभएको छ। लगातार छ संस्करणको विश्वकप खेल्नुभएका मेसीले यस संस्करणमा मात्र आठ गोल गर्दै क्लोजको कीर्तिमान तोड्नुभएको थियो।
तर एम्बाप्पेको लगातार उत्कृष्ट प्रदर्शनपछि उहाँ दोस्रो स्थानमा झर्नुभएको हो। यद्यपि स्पेनविरुद्धको फाइनल मेसीका लागि इतिहास फेरि आफ्नो पक्षमा पार्ने अवसर बनेको छ।
फाइनलमा दुई गोल गर्न सके उहाँको कुल गोल सङ्ख्या २३ पुग्नेछ र उहाँ फेरि विश्वकप इतिहासकै सर्वाधिक गोलकर्ता बन्नुहुनेछ। एक गोल गर्नुभयो भने दुवै खेलाडी २२–२२ गोलसहित संयुक्त रूपमा शीर्ष स्थानमा रहनेछन्।
विश्वकप इतिहासका सर्वाधिक गोलकर्ताको सूचीमा अहिले एम्बाप्पे र मेसीपछि जर्मनीका मिरोस्लाभ क्लोज १६ गोलसहित तेस्रो स्थानमा रहनुभएको छ।
ब्राजिलका महान् स्ट्राइकर रोनाल्डो नाजारियो १५ गोलका साथ चौथो स्थानमा हुनुहुन्छ भने पश्चिम जर्मनीका गर्ड म्युलर र इङ्ल्यान्डका कप्तान ह्यारी केन समान १४–१४ गोलसहित त्यसपछि रहेका छन्।
फ्रान्सका जस्ट फोन्टेनले सन् १९५८ को विश्वकपमा एकै संस्करणमा १३ गोल गर्ने कीर्तिमान भने अझै कसैले तोड्न सकेको छैन, जुन विश्वकप इतिहासकै सबैभन्दा लामो समयदेखि कायम व्यक्तिगत गोल रेकर्डमध्ये एक मानिन्छ।
यसरी स्पेन र अर्जेन्टिनाबीचको विश्वकप फाइनल उपाधिको प्रतिस्पर्धामात्र नभई एम्बाप्पे र मेसीबीच विश्वकप इतिहासकै सर्वाधिक गोलकर्ताको स्थान कसले सुरक्षित गर्ने भन्ने रोचक प्रतिस्पर्धाका रूपमा पनि विश्व फुटबल समर्थकमाझ केन्द्रबिन्दु बनेको छ।
उपाधिभन्दा ठूलो बहस
यसपटकको फाइनल उपाधि कसले जित्छ भन्नेभन्दा पनि मेसीले एम्बाप्पेको नयाँ रेकर्ड तोड्न सक्नुहुन्छ कि सक्नुहुन्न भन्ने विषय विश्वभरका फुटबल समर्थकबीच बहसको केन्द्र बनेको छ।
यदि अर्जेन्टिनाले उपाधि जित्यो र मेसीले कम्तीमा दुई गोल गर्नुभयो भने उहाँ विश्वकप इतिहासकै सर्वाधिक गोलकर्ता बन्नुका साथै आफ्नो महान् करिअरमा अर्को अविस्मरणीय उपलब्धि थप्नुहुनेछ।
अर्कोतर्फ, एम्बाप्पेको २२ गोलको रेकर्ड जोगिएमा आगामी धेरै वर्षसम्म उहाँकै नाम विश्वकप इतिहासको सर्वाधिक गोलकर्ताका रूपमा अंकित रहनेछ।
यसरी स्पेन र अर्जेन्टिनाबीचको विश्वकप फाइनल केवल उपाधिको भिडन्त मात्र नभई विश्व फुटबलको इतिहासमा अर्को स्वर्णिम अध्याय लेखिने क्षणका रूपमा विश्वभर उत्सुकतापूर्वक प्रतीक्षा गरिएको छ।
(फोटो साभार इएसपीएन)
प्रतिक्रिया राख्नुहोस्