अमेरिकी राष्ट्रपति डोनाल्ड ट्रम्पले जापान, चीन, भारत जस्ता मुलुकबाट आयात हुने सामानमाा व्यापक करवृद्धि गरेपछि यी मुलुकहरु नजिकिंदै आर्थिक सहयात्रा बढाउन अग्रसर भएका छन् ।
अमेरिकाले जापान र भारतलाई अत्यधिक कर लगाएपछि यी दुई मुलुकबीच व्यापारिक र सामसिक सम्बन्ध अरु मजबुत बनेको छ । यी दुई देशबीचको द्विपक्षीय व्यापार हाल वार्षिक २० अर्ब डलरभन्दा बढीको छ ।
यसै क्रममा भारतीय प्रधानमन्त्री नरेन्द्र मोदीको जापान भ्रमणका क्रममा जापानले भारतमा ६८ अर्ब अमेरिकी डलर लगानी गर्ने प्रतिबद्धता जनाएको छ ।
जापानका प्रधानमन्त्री शिगेरु इशिबाले भन्नुभयो, “भारतको विशाल बजार यति धेरै सम्भावनाले भरिएको छ कि यसको जीवन्ततालाई समावेश गर्दा जापानको अर्थतन्त्रको वृद्धिलाई अगाडि बढाउन मद्दत पुग्नेछ ।
चीन भ्रमणअघि प्रधानमन्त्री मोदीको दुई दिने भ्रमणका क्रममा बोल्दै इशिबाले जापानले भारतमा लगानी बढाएर १० ट्रिलियन येन (६८ अर्ब अमेरिकी डलर) पुर्याउने र सेमीकन्डक्टर र एआईमा केन्द्रित सहकार्य पहल गर्ने बताउनुभयो।
जापानको ‘सेल्फ डिफेन्स फोर्सेज’ र भारतीय सशस्त्र बलबीच सैन्य अभ्यास विस्तार गर्न दुवै पक्ष सहमत भएका छन् । जापानी प्रधानमन्त्री इशिबाले पत्रकारहरूसँग भन्नुभयो, “अन्तर्राष्ट्रिय परिस्थिति झन्झन् अनिश्चित हुँदै जाँदा जापान र भारतले यस क्षेत्रको शान्ति र स्थिरताका लागि हातेमालो गर्नैपर्छ।”
प्रधानमन्त्री मोदीले भन्नुभयो, “भारत र जापान स्वतन्त्र, खुला, शान्तिपूर्ण, समृद्ध र नियममा आधारित इन्डो–प्यासिफिकका लागि पूर्ण प्रतिबद्ध छन् ।”
यसअघि मोदीले टोकियोमा आयोजित एक व्यापारिक मञ्चमा भारत र जापानले ‘एसियाली शताब्दीलाई आकार दिने’ र भारत ‘ग्लोबल साउथमा जापानी व्यवसायका लागि स्प्रिङबोर्ड’ भएको बताउनुभएको थियो।
अमेरिकी कर वृद्धिपछि विश्वका शक्तिशाली राष्ट्रहरुको गठजोड बलियो बन्दै गएको छ । चीन, रुस, भारत जस्ता देशहरु एकठाउँमा उभिन पुगेका छन् । शांघाई सहयोग सङ्गठन (एससिओ)को शिखर सम्मेलनमा रुसी राष्ट्रपति भ्लादिमिर पुटिनको सहभागिता यसैको संकेत हो ।
भारतीय प्रधानमन्त्री नरेन्द्र मोदी नौ वर्षपछि चीन भ्रमणमा निस्कनुभएको छ । विश्वमा नयाँ आर्थिक शक्तिका रुपमा उदाउँदै अधिक राष्ट्रहरुको सहभागिता रहेको एससिओ सम्मेलन र यसले गर्ने निर्णयप्रति सर्वाधिक चासो रहेको छ ।
प्रतिक्रिया राख्नुहोस्