लमजुङको क्व्होलासोथार गाउँपालिका–५ मा अवस्थित सिङ्दी गाउँ प्राकृतिक सौन्दर्यसँगै गुरुङ समुदायको मौलिक संस्कृति, परम्परा र धार्मिक जीवनशैलीले मनै लोभ्याउने गन्तव्यका रूपमा चिनिन थालेको छ।
समुद्री सतहबाट करिब १ हजार ५१५ मिटरको उचाइमा रहेको सिङ्दी पहाडी भूगोल, हरियाली, स्वच्छ वातावरण र ग्रामीण जीवनशैलीका कारण आन्तरिक पर्यटकका लागि आकर्षक बन्दै गएको हो।
क्व्होलासोथार क्षेत्र लमजुङको गुरुङ समुदायको ऐतिहासिक थातथलोका रूपमा परिचित छ। गाउँपालिकाको अधिकांश भूभाग पहाडी र ग्रामीण प्रकृतिको छ भने यहाँ गुरुङ समुदायको उल्लेख्य बसोबास रहेको छ। यस क्षेत्रको प्राकृतिक बनोट र गुरुङ समुदायको मौलिक जीवनशैलीले गाउँलाई अन्य पर्यटकीय गन्तव्यभन्दा पृथक् पहिचान दिएको छ।
सिङ्दीमा पुग्दा परम्परागत ग्रामीण जीवनशैली, स्थानीय रहनसहन, गुरुङ समुदायको भाषा, भेषभूषा, खानपान र सामुदायिक संस्कृतिको अनुभूति गर्न सकिन्छ। गुरुङ समुदायको सामाजिक जीवनमा रोधी, सामुदायिक सहकार्य, मौलिक नाचगान र परम्परागत संस्कारको विशेष महत्त्व रहँदै आएको छ।
रोधी परम्पराले पुस्तौँदेखि युवापुस्तामा सामाजिक, सांस्कृतिक तथा नैतिक मूल्य–मान्यता हस्तान्तरण गर्ने माध्यमका रूपमा समेत काम गर्दै आएको छ।
पछिल्लो समय बौद्ध परम्परासँग जोडिएका धार्मिक अभ्यास पनि गुरुङ समुदायको सांस्कृतिक जीवनको महत्वपूर्ण हिस्सा बनेका छन्। गुरुङ समुदायका धार्मिक संस्कार सञ्चालनमा पच्यू, क्ल्हेब्री र लमजस्ता परम्परागत धर्मगुरुको भूमिका रहने गरेको छ।
ल्होसार गुरुङ समुदायको प्रमुख पर्व हो। यससँगै स्थानीय रूपमा मनाइने विभिन्न चाडपर्व, परम्परागत नाचगान र सांस्कृतिक गतिविधिले गाउँको सामाजिक जीवनलाई जीवन्त बनाउने गरेका छन्। क्व्होलासोथार क्षेत्रमा घाँटु, सोरठीजस्ता मौलिक सांस्कृतिक प्रस्तुति पनि पर्यटकका लागि आकर्षणका विषय बन्ने गरेका छन्।
प्राकृतिक र सांस्कृतिक दुवै पक्षको संयोजनका कारण क्व्होलासोथार क्षेत्र ग्रामीण पर्यटनका लागि महत्वपूर्ण क्षेत्रका रूपमा विकास हुँदै गएको छ। गाउँपालिकाले पनि कृषि, पर्यटन र स्थानीय रीतिरिवाजलाई आफ्नो पहिचानको आधार मानेको छ। यस क्षेत्रमा होमस्टे, स्थानीय खानपान, परम्परागत संस्कार र ग्रामीण जीवनशैलीलाई पर्यटनसँग जोड्ने प्रयास भइरहेको छ।
लमजुङमा गुरुङ समुदायको मौलिक संस्कृति पर्यटनको महत्वपूर्ण आधार बन्दै गएको छ। घलेगाउँ, भुजुङ, पसगाउँलगायतका गाउँहरूमा ग्रामीण पर्यटन विस्तार हुँदै जाँदा सिङ्दीले पनि आफ्नो प्राकृतिक र सांस्कृतिक पहिचानमार्फत पर्यटक आकर्षित गर्ने सम्भावना बोकेको छ।
स्थानीय समुदायको सहभागिता, मौलिक संस्कृतिको संरक्षण र व्यवस्थित पर्यटन पूर्वाधार विकास गर्न सके सिङ्दी पनि ग्रामीण पर्यटनको आकर्षक गन्तव्य बन्न सक्ने देखिन्छ।
यसरी प्रकृति र संस्कृतिको सुन्दर संयोजन रहेको सिङ्दी गाउँमा पुग्ने पर्यटकले केवल पहाडी दृश्यको आनन्द मात्र लिन पाउँदैनन्, गुरुङ समुदायको मौलिक जीवनशैली, धार्मिक आस्था, संस्कृति र परम्परालाई नजिकबाट बुझ्ने अवसरसमेत पाउँछन्।
त्यसैले सिङ्दी लमजुङको प्राकृतिक सौन्दर्यसँगै जीवित गुरुङ संस्कृति अनुभव गर्न चाहनेहरूका लागि आकर्षक गन्तव्यका रूपमा विस्तार हुँदै गएको छ।
तस्बिर : जनक श्रेष्ठ/रासस
प्रतिक्रिया राख्नुहोस्