देशको विद्यमान अवस्थालाई काबुमा ल्याउन वर्तमान सरकार र यसको मतियारका रुपमा रहेको संसदले नसक्ने निष्कर्षसहित संसदको चौथोा ठूलो दल राष्ट्रिय स्वतन्त्र पार्टी (रास्वपा)का सबै सांसदहरुले सामूहिक राजीनामा दिएका छन् ।
सोमबार पार्टी सभापति रवि लामिछानेले नख्खु कारागारबाटै जेनजी आन्दोलनमा सरकारले गरेको दमन र यसपछि हुनसक्ने परिस्थितिलाई नियन्त्रणमा लिन सर्वदलीय सरकार हुनुपर्ने र यसका लागि राजीनामा दिन तयार रहन निर्देशन दिनुभएको थियो ।
सोमबार नै रास्वपा संसदीय दलले सर्वदलय सरकार गठनन गर मध्यावधि निर्वाचनमा जानुपर्ने र यसका लागि सांसद पदबाट राजीनामा दिने निष्कर्ष निकालेको थियो ।
रास्वपाले प्रधानमन्त्रीको तत्काल राजीनामा, घटनाको निष्पक्ष छानविन गर्न उच्चस्तरीय न्यायिक छानविन आयोग गठन, सर्वपक्षीय नागरिक सरकार गठनको माग गरेको छ ।
यसै गरी प्रधानमन्त्री, गृहमन्त्री, सञ्चारमन्त्री साथै काठमाडौं जिल्लाका प्रमुख जिल्ला अधिकारीलाई बर्खास्तीका साथै हिरासतमा लिई सबै दोषीमाथि कडा कारबाहीको माग गरिएको छ ।
सामूहिक राजीनामापत्रमा संविधान संशोधनको प्रक्रिया आरम्भ, ठूला भ्रष्टाचारका काण्डहरुको छानबिनका लागि अधिकार सम्पन्न आयोग गठनको माग पनि गरिएको छ ।
रास्वपाका २० जना सांसदले राजीनामाको घोषणा गदै सार्वजनिक गरेको सामूहिक विज्ञप्ति यस्तो छ-
वि.सं. २०८२ भदौ २४
ने.सं.११४५ ञंलागा द्वितीया
आदरणीय आम नेपाली आमाबुबा, दाजुभाई तथा दिदीबहिनीहरु,
सामूहिक राजीनामा
देशमा व्याप्त भ्रष्टाचार, कानूनी शासनको अवहेलना, क्रुर राजनीतिक अभ्यास र सामाजिक सञ्जाल बन्द गरेर अभिव्यक्ति स्वतन्त्रता खोसिएको विरुद्धमा नेपालको पछिल्लो पुस्ता जेनजीद्वारा आयोजित आजको प्रदर्शनमा सरकारले गरेको बर्बर दमनको राष्ट्रिय स्वतन्त्र पार्टी संसदीय दल भर्त्सना गर्दछ।
निहत्था नवयुवाहरूले गरेको शान्तिपुर्ण लोकतान्त्रिक आन्दोलनको पहिलो प्रहरमै सरकारले गरेको आमहत्याको हामी घोर निन्दा गर्दै चेतावनी दिन्छौँ: आफ्नै सन्तानको रगतमा लत्पतिएर कुशासन लम्ब्याउने कुचेष्टा अब जनताले सहने छैनन् र यो आततायी शासनको जनप्रतिवाद हुनेछ ।
वर्तमान सरकारको औचित्य पूर्णत: समाप्त भइसकेको परिप्रेक्षमा देहाय बमोजिम प्रस्ताव गर्दछौः
१) प्रधानमन्त्रीको तत्काल राजीनामा
२) घटनाको निष्पक्ष छानविन गर्न उच्चस्तरीय न्यायिक छानविन आयोग गठन
३) सर्वपक्षीय नागरिक सरकार
४) प्रधानमन्त्री, गृहमन्त्री, सञ्चारमन्त्री साथै काठमाडौं जिल्लाका प्रमुख जिल्ला अधिकारीलाई बर्खास्तीका साथै हिरासतमा लिई सबै दोषीमाथि कडा कारबाही गर्न माग गर्दछौँ ।
५) संविधान संशोधनको प्रक्रिया आरम्भ
६) ठूला भ्रष्टाचारका काण्डहरुको छानबिनका लागि अधिकार सम्पन्न आयोग गठन
वर्तमान संघीय संसदले कुनै पनि राष्ट्रिय मुद्दाको हल निकाल्न असमर्थ भई वैधता गुमाएको निष्कर्षमा पुग्दै आगामी निकासका लागि शिघ्र अन्तरिम नागरिक सरकार गठनको प्रस्ताव गर्दै, सरकारबाट हत्या गरिएका जेनजी योद्धाहरूप्रति हार्दिक श्रद्धाञ्जली अर्पण गर्दै घाइते भएका सबैको शिघ्र एवं निःशुल्क उपचारको पक्षमा रहँदै, देशको मुख्य सम्पति जेन जीको माग र अपेक्षामा पूर्ण समर्थन र निरन्तर आन्दोलनमा रहने समर्पणकासाथ हामी राष्ट्रिय स्वतन्त्र पार्टीका सबै प्रतिनिधिसभा सदस्यहरु (साँसदहरु) ले सामूहिक राजीनामा दिने सचिवालयको प्रस्तावमा संसदीय दल एकमत रहेको जानकारी गराइन्छ।
१. रवि लामिछाने, संसदीय दलको नेता
२. डोल प्रसाद अर्याल, संसदीय दलको पूर्वनेता
३. डा. स्वर्णिम वाग्ले, सदस्य
४. विराजभक्त श्रेष्ठ, संसदीय दलको उपनेता
५. सन्तोष परियार, प्रमुख सचेतक
६. निशा डाँगी, सचेतक
७. मनिष झा, कोषाध्यक्ष
८. सुमना श्रेष्ठ, सदस्य
९. गणेश पराजुली, सदस्य
१०. सोबिता गौतम, सदस्य
११. डा.तोसिमा कार्की, सदस्य
१२. शिशिर खनाल, सदस्य
१३. हरि ढकाल, सदस्य
१४. प्रा.डा. चन्दा कार्की (भण्डारी), सदस्य
१५. असिम शाह, सदस्य
१६. लक्ष्मी तिवारी, सदस्य
१७. अशोक कुमार चौधरी, सदस्य
१८. शिव नेपाली, सदस्य
१९. बिनिता कठायत, सदस्य
२०. विन्दवासिनी कांसकार, सदस्य
डोल प्रसाद अर्याल, कार्यवाहक सभापति,
संसदीय दलको पूर्वनेता
प्रतिक्रिया राख्नुहोस्