गैरआवासीय नेपाली संघ (एनआरएनए)ले सिनियर विश्व कराते च्याम्पियनसिप २७ औँ संस्करणमा सहभागी हुने नेपाली टोलीलाई ट्रयाकसुट प्रदान गरेको छ ।
एनआरएनए स्पोर्टस एकेडेमीले ललितपुरको कोरियन बार्बिक्यूमा एक कार्यक्रमको आयोजना गरी नेपाली टिमलाई ट्रयाकसुट प्रदान गरेको हो ।
नोभेम्बर २७ देखि ३० तारिखसम्म हुने प्रतियोगितामा २ महिला खेलाडीले सहभागिता जनाउँदै छन् । एरिका गुरुङ ६८ केजीमाथि तथा सानुमाया थिङले एकल कातामा प्रतिस्पर्धा गर्ने कराते महासंघले जनाएको छ ।
अफिसियलमा नेपाल कराते महासंघका अध्यक्ष युवराज लामा, महासचिव दावा गुरुङ र कृष्णप्रसाद गौतम, टिम व्यवस्थापकमा रवि महर्जन तथा प्रशिक्षकमा कुशल श्रेष्ठ र मन्डेकाजी श्रेष्ठ तथा खेलाडी तारा गुरुङ र खेलाडी सन्तोष श्रेष्ठ इजिप्ट जाने छन् ।
टोलीलाई शुभकामना दिँदै एनआरएनएका उपाध्यक्ष एवं खेलकुद विभागका प्रमुख मनोज कुमार श्रेष्ठ ‘गोर्खाली’ले नेपाली खेलाडीहरूलाई सहयोग गर्न संस्था सदैव तयार रहेको बताउनुभयो ।
उहाँले आगामी दिनमा करातेलाई मात्रै नभई अन्य खेलका खेलाडीहरूलाई पनि सहयोग गर्ने प्रतिबद्धता व्यक्त गर्दै अहिले मिसन २०२६ र २०२८ को ओलम्पिक गेमका लागि विदेशमा हुने प्रशिक्षणमा एनआरएनए सहकार्य गर्न तयार रहेको बताउनुभयो ।
यसै गरी सरकारले फागुनमा दसौँ राष्ट्रिय खेलकुदको मिति तोकेकोमा स्वागत गर्दै उक्त प्रतियोगितामा एनआरएनएको टिमले पनि प्रतिस्पर्धा गर्ने र त्यसका लागि तयारी सुरु गरिसकेको जानकारी दिनुभयो ।
उहाँले भन्नुभयो, ‘हामी विभागीय टिमको हिसाबले आठौँ राष्ट्रिय देखि जोडिएका छौँ, त्यति बेला १६ र नवौँ राष्ट्रिय गेममा २४ पदक जितेका थियौँ, अब दसौँमा पनि राम्रो तयारीका साथ सहभागिता जनाउँछौँ ।’
कार्यक्रममा वागमती प्रदेशका पूर्व युवा तथा खेलकुद मन्त्री एवं प्रदेश सभा सदस्य मीनकृष्ण महर्जनले कराते खेलको विकासका लागि आफू सधैँ क्रियाशील रहने जनाउँदै खेलाडीहरूमा अनुशासन पहिलो सर्त रहेको पनि बताए । उ
यसै गरी, राष्ट्रिय खेलकुद विकास परिषद् बागमतीका सदस्यसचिव दीपक लामाले शुभकामना दिँदै अहिले विभिन्न योजनाका साथ काम भइरहेको जानकारी दिनुभयो ।
लामाले आफू प्रचारमुखी भन्दा पनि नतिजामुखी कामका विश्वास राख्ने भन्दै स्थानीय तहका केही विद्यालयमा पाइलट प्रोजेक्टको रूपमा पाठ्यक्रम तयार पारेर सुरु गर्न लागिएको जानकारी दिनुभयो ।
कार्यक्रममा खेलाडी एरिका गुरुङले विश्व च्याम्पियनसिप खेल्न पाउनु नै आफूहरूको ठूलो सफलता भएको बताउँदै खेलको नतिजाका आधारमा मात्रै मूल्याङ्कन नगर्न आग्रह गर्दै खेलाडी मैदानमा उत्रिएपछि कि जित्छ, कि सिक्छ भन्ने मान्यता राख्न अनुरोध गर्नुभयो ।
कार्यक्रममा गैरआवासीय नेपाली संघका सिइओ रविकिरण अधिकारीले स्वागत गर्दै नेपालको शिर उँचो बनाउने काम खेलाडीबाट भएको उल्लेख गर्दै खेलाडीहरूको सफलतामा एनआरएनए पनि सधैँ सहयोग गर्न तयार रहेको बताउनुभयो ।
प्रतिक्रिया राख्नुहोस्