व्यवसायी दीपक भट्टसहित सुबी अग्रवाल, राजबहादुर शाह र ऋषिराज मोरले कानुनविपरीत उधारोमा सेयर कारोबार गरेको तथ्य नेपाल धितोपत्र बोर्डको प्रतिवेदनले सार्वजनिक गरेको छ।
सम्पत्ति शुद्धीकरण अनुसन्धान विभागको अनुरोधमा तयार गरिएको उक्त प्रतिवेदनले ब्रोकर नम्बर ५५ भृकुटी स्टक ब्रोकिङ कम्पनीमार्फत अग्रिम रकम नतिरी सेयर खरिद–बिक्री गर्ने र कृत्रिम रूपमा मूल्यवृद्धि गराउने कार्य भएको देखाएको छ।
प्रतिवेदनअनुसार, ती व्यक्तिहरूले ब्रोकरसँग मिलेर बजारमा अतिरिक्त माग सिर्जना गरी सेयर मूल्य बढाउने, लगानीकर्तालाई झुक्याउने तथा धितोपत्र ऐन विपरीत कार्य गर्ने गरेको उल्लेख छ। विशेष गरी केही बीमा तथा वित्तीय संस्थाको सेयर मूल्य बढाउन योजनाबद्ध कारोबार गरिएको देखिएको छ।
यस्तै, विभिन्न कम्पनीका सेयर कारोबार खाताहरू एउटै व्यक्तिले सञ्चालन गरेको तथ्य पनि फेला परेको छ, जसलाई दीपक भट्टले बयानमा स्वीकार गरेका छन्।
हालसम्मको अनुसन्धानले देखाएका मुख्य बुँदाहरू:
गैरकानूनी कारोबार: भट्ट र अग्रवाल समूहले भृकुटी स्टक ब्रोकिङ (ब्रोकर नं. ५५) मार्फत अग्रिम रकम नदिई सेयर खरिद गर्ने र कृत्रिम माग सिर्जना गरी मूल्य बढाउने गरेको भेटिएको छ।
एउटै व्यक्तिबाट सञ्चालन: भट्ट, अग्रवाल र हिमालयन रि-इन्स्योरेन्स लगायत करिब ११ वटा कम्पनीको ट्रेडिङ म्यानेजमेन्ट सिस्टम- (टीएमएस) एउटै व्यक्तिले चलाउने गरेको बोर्डको निष्कर्ष छ।
मूल्यमा चलखेल: एनएलजी इन्स्योरेन्स र नेपाल रि-इन्स्योरेन्स जस्ता कम्पनीहरूको सेयर मूल्य नियतवश बढाएर आम लगानीकर्तालाई झुक्याएको प्रतिवेदनले औँल्याएको छ।
अर्बौँको बक्यौता: ब्रोकर कम्पनीले दीपक भट्टबाट मात्रै रु २ अर्ब ७३ करोड भन्दा बढी रकम उठाउन बाँकी छ भने हिमालयन रि-इन्स्योरेन्सलाई सोही बराबरको रकम भुक्तानी दिन बाँकी देखिएको छ।
कारबाहीको सिफारिस: धितोपत्र ऐन २०६३ बमोजिम ‘झूटो कारोबार’ गरेको ठहर गर्दै बोर्डले थप अनुसन्धानका लागि प्रहरी प्रधान कार्यालय पठाउन सिफारिस गरेको छ।
बोर्डले यस प्रकरणमा थप अनुसन्धानका लागि प्रहरीमा सिफारिस गरेको छ। प्रतिवेदनमा ठूलो परिमाणमा रकम उठाउन र भुक्तानी गर्न बाँकी रहेको देखिएको छ, जसमा भट्टसहित अन्य व्यवसायी र संस्थाहरूको अर्बौँ रुपैयाँ बराबरको लेनदेन अझै राफसाफ हुन बाँकी छ।
धितोपत्रसम्बन्धी ऐन, २०६३ अनुसार यस्ता उधारो तथा भुक्तानी नहुने कारोबारलाई ‘झूटो कारोबार’ मानिन्छ, जसमा जरिवाना, कैद वा दुवै सजायको व्यवस्था छ। साथै पीडितलाई क्षतिपूर्ति दिनुपर्ने कानुनी प्रावधान पनि रहेको छ।
ठूला व्यावसायिक घरानाहरूले ब्रोकरसँगको मिलेमतोमा बजारलाई प्रभाव पारेर सर्वसाधारण लगानीकर्तालाई जोखिममा पारेको देखिन्छ। यस प्रकरणमा हिमालयन रि-इन्स्योरेन्स, शेखर गोल्छा र रोहित गुप्ताको रकम समेत प्रयोग भएको बोर्डको प्रतिवेदनमा उल्लेख छ। दोषी देखिएमा बिगो भराउने, जरिवाना र एक वर्षसम्म कैद हुन सक्ने कानुनी प्रावधान छ।
प्रतिक्रिया राख्नुहोस्