ओपनर कुशल भुर्तेलको कीर्तिमानी शतकीय पारीमा एसियन गेम्स पुरुष क्रिकेट छनोट खेल अन्तर्गत आफ्नो दोस्रो खेलमा नेपालले मलेसिया सामू जितको लागि २ सय ७६ रनको लक्ष्य प्रस्तुत गरेको छ ।
सिंगापुरमा जारी खेलमा टस हारेर पहिले ब्याटिङ गरेको नेपालले निर्धारित २० ओभरमा ७ विकेट गुमाएर २ सय ७५ रनको विशाल योगफल तयार पारेको हो ।
नेपालका लागि ओपनर कुशलले ५४ बलमा १४ चौका र ६ छक्काको सहयोगमा १ सय २६ रनको शतकीय पारी खेले भने अर्का ओपनर आसिफ शेखले २४ बलमा ५ चौका र ७ छक्काको मद्दतमा ६८ रन्को अर्धशतकीय पारी खेले । यी दुईले पहिलो विकेटको लागि ५२ बलमा १३४ रनको शतकीय साझेदारी गरेका थिए ।
त्यस्तै कप्तान दीपेन्द्रसिंह ऐरीले ११ बलमा १ चौका र ४ छक्काको सहयोगमा ३१ रन जोड्दा सन्दीप जोराले १५, लोकेश बमले १०, तथा कुशल मल्ल ८ रनमा अविजित रहे । यस्तै करण केसीले ७ रन जोड्दा सोमपाल कामी एक यानमा अविजित रहे । मलेसियाको लागि विरनदीप सिंहले तीन विकेट लिए भने विजय उन्नी र सईद अजिजको भागमा समान दुई-दुई विकेट रायो ।
नेपालका लागि टी-२० अन्तर्राष्ट्रियमा तीन शतक प्रहार गर्ने कुशल पहिलो नेपाली खेलाडी बने । योसँगै भुर्तेलले दीपेन्द्रसिंह ऐरीलाई पछि टी-२० अन्तर्राष्ट्रियमा धेरै रन हान्ने सूचीको पहिलो नम्बरमा रहेका छन् । कुशलले २ हजार २४० रन हान्दा दीपेन्द्रले २ हजार २११ रन प्रहार गरेका छन् ।
कुशलको टी-२o अन्तर्राष्ट्रियमा यो लगातार दोस्रो शतक हो । उनी यो सफलता प्राप्त गर्ने पहिलो नेपाली क्रिकेटर हुन् । कुशलले जारी प्रतियोगिता अन्तर्गत नै चीनसँगको खेलमा पनि शतक बनाएका थिए ।
प्रतिक्रिया राख्नुहोस्