जुन महिनामा परेको रेकर्डस्तरको गर्मीको लहरका कारण बेलायती अर्थतन्त्रले एक अर्ब १५ करोड पाउन्ड (करिब एक अर्ब ५० करोड अमेरिकी डलर) बराबरको क्षति बेहोरेको नयाँ अध्ययनले देखाएको छ ।
अत्यधिक गर्मीका कारण विशेष गरी बाहिरी वातावरणमा शारीरिक श्रम गर्ने कामदार सबैभन्दा बढी प्रभावित भएको अध्ययनले जनाएको छ ।
लन्डन स्कुल अफ इकोनोमिक्स (एलएसई) को ग्रान्थम रिसर्च इन्स्टिच्युट र युरो–मेडिटेरेनियन सेन्टर अन क्लाइमेट चेन्ज (सीएमसीसी) ले सार्वजनिक गरेको अध्ययनअनुसार निर्माण र कृषि क्षेत्रका कामदारले अत्यधिक गर्मीका कारण आफ्नो काम गर्ने समय उल्लेखनीय रूपमा घटाएका थिए । तुलनात्मक रूपमा कम शारीरिक श्रम हुने पेशामा कार्यरत व्यक्तिहरूमा यस्तो प्रभाव कम देखिएको अध्ययनले जनाएको छ ।
अध्ययनअनुसार जुन २२ परेको सातामा कामदारहरूले औसतमा शून्य दशमलव ४७ घण्टा कम काम गरेका थिए । त्यस्तै, ३.६ प्रतिशत उत्तरदाता अर्थात् करिब १२ लाख ५० हजार कामदार अत्यधिक गर्मीका कारण त्यो साताभर काममा उपस्थित हुन सकेनन् ।
अनुसन्धानकर्ताहरूले काम गर्ने समय, निद्राको गुणस्तर तथा कार्यस्थलसम्म पुग्ने क्रममा गर्मीले पारेको प्रभावसमेत अध्ययन गरेका थिए ।
अधिकांश उत्तरदाताले निद्रामा अवरोध, कामका क्रममा थकान, चक्कर लाग्ने, बेहोस हुने तथा मुटुको धड्कन असामान्य रूपमा बढ्ने जस्ता कम्तीमा एउटा स्वास्थ्य समस्या अनुभव गरेको बताएका छन् ।
गत जुनमा बेलायतसँगै फ्रान्स र अन्य युरोपेली मुलुकहरूले पनि असाधारण गर्मीको सामना गरेका थिए । त्यसक्रममा यातायात सेवा, विद्यालय र अस्पतालको नियमित सञ्चालन प्रभावित भएको थियो भने अत्यधिक गर्मीसँग जुध्न पूर्वाधार पर्याप्त रूपमा तयार नरहेको विषयमा पनि चिन्ता व्यक्त गरिएको थियो ।
ग्रान्थम रिसर्च इन्स्टिच्युटकी निर्देशक एलिजाबेथ रोबिन्सनले अध्ययनले बेलायत परिवर्तनशील जलवायुसँग पर्याप्त रूपमा अनुकूल हुन नसकेको स्पष्ट देखाएको बताउनुभयो ।
उहाँले सरकारले चरम गर्मीको जोखिमलाई अब पनि बेवास्ता गर्न नसक्ने उल्लेख गर्दै तत्काल प्रभावकारी तयारी र अनुकूलनका उपाय अघि बढाउन आग्रह गर्नुभयो ।
वैज्ञानिकहरूले जलवायु परिवर्तनका कारण चरम मौसमीय घटना झन् बारम्बार र तीव्र बन्दै गएको चेतावनी दिँदै आएका छन् । यसै सन्दर्भमा इङ्गल्यान्डले यस वर्षको जुन महिनालाई आफ्नो इतिहासकै सबैभन्दा तातो जुनका रूपमा अभिलेख गरेको छ
प्रतिक्रिया राख्नुहोस्