कोरोना भाइरसको महामारीका बेला काम नपाएर बसेकाहरुलाई बेरोजगार बीमावापत गलत सूचना दिएर रकम ठगी भएको भन्दै न्युयोर्क राज्य सरकारले रकम फिर्ता माग्ने भएको छ ।
राज्य सरकारको डिपार्टमेन्ट अफ लेबरले महामारीमा बेरोजगारी बीमामा ४ सय २५ मिलियन डलर रकम बढी बाँडिएको भन्दै कतिपय व्यक्तिबाट रकम फिर्ता मागेको हो ।
न्युयोर्क राज्यमा बेरोजगारी बीमा रकम प्राप्तकर्ताहरूले आफूले पेश गरेको जानकारी साँचो ठानेको अवस्थामा पनि ठगीको लागि दोषी पाउन सकिने प्रावधान छ । अहिले बेरोजगारी विमावापत बाडेको रकम फिर्ता गर्नेमा अमेरिकामा न्युयोर्क राज्य अग्रस्थानमा देखिएको छ ।
न्युयोर्क राज्यको डिपार्टमेन्ट अफ लेबरले राज्य सरकारले सन् २०२० र २०२३ को बीचमा ४ सय २५ मिलियन बढी डलर भुक्तानी गरेको र तीमध्ये झन्डै दुई तिहाई धोखाधडी सम्बन्धित भएको जनाएको छ ।
धोखाधडी भएको पाइएमा रकम प्राप्तकर्ताहरू उक्त रकम फिर्ता गर्न बाध्य हुन्छन् । यदि कसैले जानी जानी गलत विवरण नदिएको भएमा राज्यहरूले निश्चित अतिभुक्तानीहरू फिर्ता गर्ने दायित्वलाई माफ पनि गर्न सक्छन् ।
बीमा रकम लिएकाहरुले पाँच सदस्यीय बेरोजगारी बीमा अपील बोर्डमा अपील पनि गर्न सक्छन् । तर बोर्डले प्राय आक्रामक रवैया अपनाउने गरेको जनाइएको छ ।
निर्वाचन निकट रहेकाले राष्ट्रपति जो बाइडेनको प्रशासनले भने राज्यहरूलाई महामारीमा गल्तीले गरिएका भुक्तानहरू माफ गर्न दवाव दिइरहेको छ ।
यसअघि म्यासाचुसेट्स र कनेक्टिकट जस्ता राज्यहरूले २०२० देखि २०२३ सम्मका क्रमशः २८ प्रतिशत र १९ प्रतिशत राज्य र संघीय मामिलाहरू माफ गरेका थिए । टेक्सासले पनि ३४ प्रतिशत माफ गरेको थियो ।
तर न्युयोर्कले भने जम्मा ३ प्रतिशत मात्र माफी गरेको छ । डिपार्टमेन्ट आफ लेबरले गल्तीको जिम्मेवारी डिपार्टमेन्ट आफैं रहेको अवस्थामा पनि सेवाग्राहीलाई नै ठगी गरेको आरोप लगाउने गरेको छ ।
महामारीका बेला बेराजगार बीमा फारम भरेर रकम लिनेहरुमा धेरै नेपाली पनि रहेका छन् । राज्य सरकार कठोर बनेमा धेरै नेपालीले रकम फिर्ता गर्नुपर्नेछ ।
प्रतिक्रिया राख्नुहोस्