जापानकी प्रधानमन्त्री सानाए ताकाइचीले जी–७ शिखर सम्मेलनमा ‘पार्टनरसिप अन वाइड इनर्जी एन्ड रिसोर्सेज रेजिलियन्स (पावर एसिया)’ नामक नयाँ सहकार्य ढाँचा प्रस्तुत गर्नुभएको छ ।
बैठकमा प्रधानमन्त्री ताकाइचीले सहकार्य ढाँचा प्रस्तुत गर्दै अन्तर्राष्ट्रिय ऊर्जा एजेन्सी (आईईए) सँगको सहकार्यमा विश्वव्यापी तेल भण्डारण क्षमता सुदृढीकरणको प्रस्ताव राख्नुभएको छ।
पश्चिम एसियासम्बन्धी छलफलमा उहाँसँगै इजिप्ट, कतार र संयुक्त अरब इमिरेट्सका नेताहरू सहभागी थिए। उक्त अवसरमा ताकाइचीले हर्मुज जलडमरूमध्यमा सुरक्षित र स्वतन्त्र जल यातायातको महत्त्व औंल्याउँदै जापानको ‘पावर एसिया’ पहल प्रस्तुत गर्नुभयो।
सामाजिक सञ्जाल एक्स (एक्स) मा प्रतिक्रिया दिँदै प्रधानमन्त्री ताकाइचीले जापानद्वारा सुरु गरिएको ‘पावर एसिया’ कार्यक्रम प्रस्तुत गरिएको र विभिन्न देशहरूको तेल भण्डारण क्षमता विस्तार गर्न आईईएसँग मिलेर काम गर्ने प्रस्तावले सहभागी राष्ट्रहरूको समर्थन प्राप्त गरेको जानकारी दिनुभयो।
‘पार्टनरसिप अन वाइड इनर्जी एन्ड रिसोर्सेज रेजिलियन्स (पावर एसिया)’ जापानले यसै वर्ष अप्रिलमा सार्वजनिक गरेको नयाँ क्षेत्रीय सहकार्य ढाँचा हो। यसअन्तर्गत कच्चा तेल तथा पेट्रोलियम पदार्थको आपूर्ति सुनिश्चित गर्न वित्तीय व्यवस्थापन, आपूर्ति शृंखला सुदृढीकरण, महत्वपूर्ण खनिजहरूको सुरक्षा तथा ऊर्जा स्रोतहरूको विविधीकरणमा सहयोग गरिनेछ।
जी–७ सम्मेलनका क्रममा ताकाइचीले अमेरिकी राष्ट्रपति डोनाल्ड ट्रम्पसँग पनि भेटवार्ता गर्नुभएको थियो। भेटमा अमेरिका–इरानबीच भएको शान्ति सम्झौताको स्वागत गर्दै जापान–अमेरिका भन्सार शुल्क (ट्यारिफ) सम्बन्धी सहमति कार्यान्वयनका विषयमा छलफल भएको थियो। साथै, चीनलगायत इन्डो–प्यासिफिक क्षेत्रका सुरक्षा चुनौतीबारे दुवै देशबीच निरन्तर समन्वय कायम राख्ने सहमति भएको जनाइएको छ।
प्रधानमन्त्री ताकाइचीले इन्डो–प्यासिफिक क्षेत्र र मध्यपूर्वको बदलिँदो अन्तर्राष्ट्रिय परिस्थितिबारे जापान र अमेरिकाबीच निकट सम्पर्क कायम रहने बताउनुभयो।
युक्रेनको अवस्थाबारे बोल्दै उहाँले युक्रेनमा शान्ति स्थापना गर्न जी–७ राष्ट्रहरूले निरन्तर सहयोग गर्ने प्रतिबद्धता दोहोर्याएको जानकारी दिनुभयो।
उहाँले बल प्रयोगमार्फत यथास्थिति परिवर्तन गर्ने प्रयास स्वीकार्य नहुने उल्लेख गर्दै रुसको युक्रेनमाथिको आक्रमणको आलोचना गर्नुभयो। साथै, रुस–उत्तर कोरिया तथा रुस–चीनबीच बढ्दो सैन्य सहकार्यप्रति पनि चिन्ता व्यक्त गर्नुभयो।
जी–७ सम्मेलनकै क्रममा ताकाइचीले भारतीय प्रधानमन्त्री नरेन्द्र मोदीसँग पनि भेटवार्ता गर्नुभएको थियो। भेटमा व्यापार तथा लगानीलाई प्राथमिकतामा राख्दै जापान–भारत आर्थिक सहकार्यलाई थप विस्तार गर्ने विषयमा छलफल भएको थियो।
यसअघि जी–७ राष्ट्रहरूको कार्यभोजका क्रममा रुस–युक्रेन युद्ध, पश्चिम एसियाको सुरक्षा अवस्था तथा चीनबाट उत्पन्न चुनौतीलगायत समसामयिक भूराजनीतिक विषयमा पनि विस्तृत छलफल भएको जापानी प्रधानमन्त्रीले बताउनुभएको छ।
प्रतिक्रिया राख्नुहोस्