जिम्बाब्वेमा जारी आईसीसी एकदिवसीय विश्वकप छनोट प्रतियोगिता अन्तर्गत तेस्रो खेलमा नेपाल टेष्ट राष्ट्र वेस्ट इन्डिजसँग १०१ रनले पराजित भएको छ ।
जिम्बावेको राजधानी हरारे स्पोर्टस् क्लबमा भएको खेलमा टस हारेर पहिले ब्याटिंग गरेको वेस्ट इन्डिजले निर्धारित ५० ओभरमा ७ विकेट गुमाउँदै ३३९ रन बनायो । वेस्ट इन्डिजको लागि कप्तान साइ होप र निकोलश पुरनले शतकीय पारी खेल्दै क्रमश: १३२ र ११५ रन बनाए । त्यस्तै ब्रानडन किङ्ग ३२ रन बनाई आउट भए भने रोमन पावेलले २९ रन जोड्दा जेसन होल्डर १६ रनमा अविजित रहे ।
नेपालको लागि ललित नारायण राजवंशीले ३ विकेट लिए भने करण केसी, सन्दीप लामिछाने, दीपेन्द्र सिंह ऎरी र गुलशन झाको भागमा समान १-१ विकेट रह्यो । ३४० रनको लक्ष्य लिएर मैदान उत्रेको नेपाल नेपालले ४९ दशमलब ४ ओभरमा अलआउट हुँदै २३८ रन मात्र बनायो ।
नेपालका लागि आरिफ शेखले ६३ रनको अर्धशतकीय पारी खेले भने गुलसन झाले ४२ रन बनाए । यस्तै कप्तान रोहित पौडेलले ३० आसिफ शेखले २८ र करण केसीले २७ बलमा ४ चौका र १ छक्काको सहयोगमा २८ रन बनाए । वेस्ट इन्डिजका लागि जेसन होल्डरले ३ विकेट लिए भने अल्जारी जोसेफ, किमो पल र अकिल होसेनले समान २-२ विकेट लिंदा कायल मेयर्सको भागमा १ विकेट रह्यो । ।
नेपाल पहिलो खेलमा घरेलु टोली जिम्बाब्वेसँग ८ विकेटले पराजित हुँदा दोस्रो खेलमा अमेरिकालाई ७ विकेटले पराजित गरेको थियो भएको थियो भने वेस्ट इन्डिजले भने अमेरिकालाई ३९ रनले पराजित गरेको थियो । जितसंगै वेस्ट इन्डिज २ खेलमा ४ अंकका साथ समूह ए को शीर्ष स्थानमा उक्लिएको छ भने समान ३ खेलमा २ अंक जोडेको नेपाल चौथो स्थानमा झरेको छ । समूहका शीर्ष तीन टोली सुपर सिक्समा प्रवेश गर्नेछन् ।
छनोट प्रतियोगितामा नेपाली टोली समूह ‘ए’ मा परेको छ । नेपालको समूहमा आयोजक जिम्बाब्वे, वेस्ट इन्डिज, नेदरल्यान्ड्स र अमेरिका रहेका छन् । समूह ‘बी’ मा आयरल्यान्ड, ओमान, स्कटल्यान्ड, श्रीलंका र यूएई रहेका छन् । विश्वकप छनोटको अब नेपालले अन्तिम तथा चौथो खेल २४ जुनमा नेदरल्याण्ड्ससँग खेल्नेछ ।
विश्वकप छनोटमा लिग -२ बाट नेपाल, स्कटल्यान्ड र ओमानले स्थान बनाउँदा विश्वकप सुपर लिगमा पुछारको पाँचमा रहेका श्रीलंका, वेस्ट इन्डिज, जिम्बाब्वे, आयरल्यान्ड र नेदरल्यान्ड्सले विश्वकप छनोटमा स्थान पक्का गरेका हुन् ।
प्रतिक्रिया राख्नुहोस्