चीनबाट सुरु भएको कोरोना भाइरस संक्रमणबाट आक्रान्त युरोपका कतिपय मुलुकहरुमा लकडाउन हटेर जनजीवन सामान्य बनाउने निर्णय गरेसंगै त्यहाँ सङ्क्रमण थप फैलिएको भन्दै विश्व स्वास्थ्य सङ्गठन (डब्लूएचओ)ले चिन्ता व्यक्त गरेको छ । गत मे २० देखि युरोपभरि दैनिक औसत २० हजार जना सङ्क्रमित थपिने गरेको डब्लूएचओले जनाएको छ ।
डब्लूएचओको युरोप शाखाले शुक्रबार चासो देखाउँदै सङ्क्रमण बढेका मुलुकमा निषेधात्मक व्यवस्थाहरूलाई अवलम्बन गर्नुपर्नेमा पनि जोड दिएको छ ।
गत बिहीबारसम्ममा युरोपमा ३० लाखभन्दा बढीमा सङ्क्रमण पुष्टि भएको अधिकारीहरूले जानकारी दिएका छन् । त्यसैगरी मृतकको सङ्ख्या पनि बढीरहेको उनीहरूको भनाइ छ । युरोपेली राष्ट्रहरू फ्रान्स, जर्मनी, बेलायत, स्पेन र इटली केही समय पहिलेसम्म अत्यधिक प्रभावित मुलुक रहेको भए पनि ती मुलुकहरूमा पछिल्लो समयमा सङ्क्रमण घट्दो क्रममा रहेको देखिन्छ । यद्यपि महामारी नियन्त्रणमा नै आइसकेको भने होइन ।
पूर्व सोभियत सङ्घबाट छुट्टिएर स्वतन्त्र बनेको किर्गिजस्तान कोरोनाको महामारीबाट सबैभन्दा बढी ग्रसित भएको छ । त्यसैगरी मोन्टेनेग्रो, लक्जेम्बर्ग, बोस्निया हर्ज गोभिना, सर्बिया, रोमानिया र बुल्गेरिया पनि धेरै प्रभावित देशमा पर्दछन् ।
डब्लूएचओका एक जना प्रवक्ताले भन्नुभयो, “पछिल्लो समय कतिपय देशहरूमा सङ्क्रमितहरूको सङ्ख्या झन झन बढेको छ, भौतिक दूरी कायम गर्नेलगायतका आधारभूत स्वास्थ्य सतर्कता अपनाउनु पर्ने आवश्यकता देखिएको छ ।”
प्रतिक्रिया राख्नुहोस्