सरकारले विश्वव्यापी महामारी फैलाइरहेको कोरोना भाइरस संक्रमितको उपचार समेत नगर्ने निर्णय गरेपछि जनता अभिभभावकविहीन भएको आम टिप्पणीकाबीच पूर्वराजा ज्ञानेन्द्र शाहले वर्तमान जनतालाई बचाउन सकेमात्र राज्य बच्ने र राज्य रहेमात्र राजनीति बाँच्ने आत्मबोध सबैमा हुनुपर्ने सन्देश दिनुभएको छ ।
बडादशैंको अवसरमा शुभकामना सन्देश दिंदै पूर्व राजाले वर्तमान समयमा आम जनताको दैनिक जीवन अत्यन्त कष्टकर बन्दै गएको र नेपाली जनता अभिभावकविहीन ‘टुहुरा बनेको पीडाबोध भइरहेको बताउनुभएको छ ।
सरकारप्रति आक्रामक देखिनुभएका शाहले सन्देशमा भन्नुभएको छ ‘संकटको घडीमा अभिभावकको क्षमता र हैसियत स्पष्ट हुन्छ भन्ने आम मान्यताका आधारमा हेर्दा सबै नेपाली जनता अभिभावकविहीन टुहुरा बनेको पीडाबोध यतिबेला हुँदैछ ।’
विदेशमा गएर रोजगारीमा लागेकाहरू संकटमा छन् भन्दै देशभित्र उनीहरूको श्रम, सीप र सामर्थ्यको सदुपयोग गर्ने कुनै बन्दोबस्त नभएकोमा रोष प्रकट गर्दै भन्नुभएको छ देश, समाज र परिवारको मोह ममताले आएकाहरू पनि फेरि कामका लागि विदेशतिरै लर्को लागेको मार्मिक अवस्था देखिन्छ’ ।
पूर्वराजा शाहले राहत, रोजगार र रोगको उपचार खोज्दै भौंतारिका जनसमूहलाई भरपर्दो आड आधारको आवश्यकता महशुस गराउन नसकिएको, दैनिक जीविकाको अत्यावश्यक वस्तुको मूल्यवृद्धि, अभाव र गुणस्तरीयतामा ह्रासजस्ता विषयले जनजीवन पिरोलिएको पनिबताउनुभएको
छ ।
‘समाजमा अनेक आपराधिक गतिविधि र पिसाच प्रवृत्ति बढ्दो छ, यसले मानसिक तनावको परिस्थिति पनि खडा गरेको छ, आज सबैले बढ्दो आशुरी र भष्मासुरी प्रवृत्तिबाट जनताले उन्मुक्ति चाहिरहेका छन् ।
शाहले ‘नेपाललाई चिनौं, नेपालीलाई बुझौं, नेपाली भएर बाँचौं अनि नेपाल र नेपालीको निम्ति सोचौं’ भन्दै नेपालकै हितका खातिर र नेपाली शैली अंगालेर उज्यालो बाटोतिर लैजाऔं भनेर आग्रह गर्दै आएको बताएका छन्।
प्रतिक्रिया राख्नुहोस्