जापानको कोबेमा बुधबार भएका दुई छुट्टाछुट्टै गोलीकाण्डमा एक जनाको मृत्यु भएको छ भने अर्का एक जना घाइते भएका छन् । तुलनात्मक रूपमा सुरक्षित मानिने जापानमा यस किसिमका गोलीकाण्ड निकै दुर्लभ मानिन्छन् ।
पहिलो तथा घातक गोलीकाण्ड कोबे सहरको चुओ वार्डमा भएको हो । दिउँसो करिब १ः१५ बजे प्रहरीलाई खबर गरिएपछि ५८ वर्षीय मासायुकी अकादा घाइते अवस्थामा सडकमा लडिरहेको भेटिएका थिए । कम्पनीका कार्यकारी अकादालाई तत्काल अस्पताल लगिए पनि चिकित्सकले मृत घोषणा गरेका थिए ।
त्यसको केही मिनेटपछि कोबेकै ह्योगो वार्डमा अर्का एक पुरुषमाथि गोली प्रहार भएको थियो । उनको अवस्था भने गम्भीर नरहेको बताइएको छ ।
यस घटनाको सम्बन्धमा प्रहरीले सोही दिन ७९ वर्षीय नाओतो कामेतानीलाई हत्या प्रयासको आरोपमा पक्राउ गरेको छ । पूर्व याकुजा सदस्य रहेको बताइएका कामेतानीले प्रहरीसमक्ष आरोप स्वीकार गर्दै आफूविरुद्धको प्रहरी आशंकामा ‘कुनै गल्ती नभएको’ बताएका छन् ।
द जापान टाइम्सको रिपोर्ट अनुसार कामेतानीमाथि आवासीय क्षेत्रमा पार्किङ गरिएको कारभित्र रहेका ५४ वर्षीय पुरुषको पेटमा गोली प्रहार गरेको आरोप छ । चुओ वार्डमा भएको घातक गोलीकाण्डमा पनि कामेतानीको संलग्नता थियो कि थिएन भन्नेबारे प्रहरीले अनुसन्धान गरिरहेको छ ।
जापानमा ज्यान जाने गरी हुने गोलीकाण्ड अत्यन्तै दुर्लभ मानिन्छ । ह्योगो प्रिफेक्चरल प्रहरीले दिएको विवरणअनुसार सन् २०२४ र २०२५ मा ह्योगो प्रिफेक्चरमा बन्दुक प्रयोग भएको कुनै पनि घटना भएको थिएन ।
गत वर्ष जापानभर बन्दुक प्रहारको एउटा मात्र घटना भएको थियो । सन् २०२१ देखि २०२४ सम्म यस्ता ३१ घटना भएको तुलनामा यो संख्या निकै कम हो ।
सन् २०२१ देखि २०२५ सम्म जापानमा भएका १५ वटा गोलीकाण्डजन्य मृत्युका घटनामध्ये सात वटा आपराधिक गिरोहसँग सम्बन्धित रहेको प्रहरीको तथ्यांकले देखाएको छ । यसले जापानमा हुने सीमित गोलीकाण्डमध्ये ठूलो हिस्सा गिरोहसँग सम्बन्धित हुने गरेको छ।
प्रतिक्रिया राख्नुहोस्