उत्तर कोरियाको एउटा कुख्यात ह्याकिङ समूहले यस साताको अन्त्यमा झण्डै ३० करोड डलर बराबरको क्रिप्टोकरेन्सी चोरी गरेको हुनसक्ने पीडित पक्षले बताएको छ। यो यस वर्षकै सबैभन्दा ठूलो क्रिप्टो चोरी हो ।
संयुक्त राष्ट्रसंघको एक प्यानलका अनुसार, उत्तर कोरियाले आफ्नो आणविक हतियार विकासका लागि कोष जुटाउन चोरी गरिएको क्रिप्टोकरेन्सी प्रयोग गर्ने गरेको छ। यो घटना उत्तर कोरियासँग जोडिएको पछिल्लो साइबर अपराधको कडी हो।
डिजिटल मुद्रा समाचार साइट क्वाइनडेस्कका अनुसार, शनिबार अनलाइन लगानी उपकरण केल्पडाओ को भल्टमा भएको यो चोरी सन् २०२६ को अहिलेसम्मकै सबैभन्दा ठूलो ‘क्रिप्टो एक्स्प्लोइट’ हो।
मंगलबार केल्पडाओले दिएको जानकारी अनुसार, ह्याकिङका क्रममा लेयरजिरो नामक अर्को क्रिप्टो प्रविधि एप्लिकेसनद्वारा सञ्चालित दुईवटा ब्लकचेन सर्भरहरू ह्याक गरिएका थिए। यसले गर्दा ‘इथेरियम’सँग सम्बन्धित क्रिप्टोकरेन्सी टोकनहरू केल्पडाओबाट चोरी हुन पुग्यो।
लेयरजिरोले एक विज्ञप्ति जारी गर्दै भनेको छ, “अप्रिल १८, २०२६ मा केल्पडाओबाट लगभग २९ करोड डलर चोरी भएको छ। प्रारम्भिक संकेतहरूले यो काम उत्तर कोरियाको लाजरस ग्रुप जस्तो उच्च-स्तरीय सरकारी समूहको हुनसक्ने देखाएको छ।”
यद्यपि, कम्पनीले अन्य एसेट वा एप्लिकेसनहरूमा यसको कुनै असर नपर्ने भन्दै प्रयोगकर्ताहरूलाई आश्वस्त पारेको छ। ब्लकचेन प्रविधिले सरकार वा बैंक जस्ता मध्यस्थकर्ताहरू बिना नै कारोबार गर्न अनुमति दिन्छ, जसलाई विकेन्द्रीकृत वित्त भनिन्छ।
नाइन ब्लक्स क्यापिटल म्यानेजमेन्टका सह-संस्थापक हेन्री अर्सलानियनले भने, “यस्ता घटनाले ‘डिफी’को संसारमा प्रवेश गर्न चाहने नयाँ मानिसहरूलाई थप त्रसित बनाउनेछ। यो स्पष्ट रूपमा उत्तर कोरियाको लाजरस समूहकै काम हो। विश्वभर यस्तो ठूलो ह्याक गर्ने क्षमता र शक्ति अरू कुनै समूहसँग छैन।”
संयुक्त राष्ट्रसंघको प्यानलले सन् २०२४ मा गरेको अनुमान अनुसार, उत्तर कोरियाले सन् २०१७ देखि हालसम्म ३ अर्ब डलरभन्दा बढीको क्रिप्टोकरेन्सी चोरी गरिसकेको छ।
गत वर्ष पनि अमेरिकाले उत्तर कोरियामाथि १.५ अर्ब डलर बराबरको डिजिटल सम्पत्ति चोरी गरेको आरोप लगाएको थियो, जुन तत्कालीन समयको इतिहासकै सबैभन्दा ठूलो चोरी थियो।
प्रतिक्रिया राख्नुहोस्