जापानको राजधानी टोकियोको उत्तरतर्फ रहेको तोचिगी प्रिफेक्चरमा एक परिवारमाथि भएको घातक आक्रमणको घटनामा संलग्न रहेको आरोपमा प्रहरीले थप एक महिलालाई पक्राउ गरेको छ । यसअघि पाँचजना पक्राउ परिसकेका छन् ।
जापानी संचार माध्यम नएचकेका अनुसार प्रहरीले ती महिलालाई आइतबार दिउँसो टोकियो नजिकैको कानागावा प्रिफेक्चरबाट नियन्त्रणमा लिएको हो । पक्राउ परेकी महिला २५ वर्षीया मियु ताकेमाए रहेको प्रहरीले जनाएको छ ।
गत बिहीबार कामिनोकावा टाउनस्थित एक घरमा धेरै व्यक्तिहरू जबर्जस्ती प्रवेश गरेका थिए । आक्रमणका क्रममा ६९ वर्षीया महिलामाथि छातीमा छुरा प्रहार गरिएको थियो । उनको घटनास्थलमै मृत्यु भएको थियो । साथै, उनका ३० र ४० वर्ष उमेर समूहका दुई छोरा घाइते भएका थिए ।
यस घटनामा संलग्न भएको आरोपमा कानागावाका १६ वर्ष उमेरका चारजना उच्च माध्यमिक तहका विद्यार्थीलाई यसअघि नै डकैती तथा हत्या अभियोगमा पक्राउ गरिएको जापानी प्रहरीले जनाएको छ ।
यसैबीच, प्रहरीले आइतबार बिहान पक्राउ परेकी महिलाका २८ वर्षीय पति ताकेमाए काइटोलाई पनि टोकियोस्थित हानेदा विमानस्थलबाट पक्राउ गरेको थियो । उनी जापानबाट भाग्ने प्रयासमा रहेको आशंका गरिएको छ ।
अनुसन्धानकर्ताहरूका अनुसार ताकेमाए दम्पतीले आक्रमणकारीहरूलाई निर्देशन दिएको हुनसक्ने विश्वास गरिएको छ । प्रहरीले पक्राउ परेका किशोरहरूलाई निर्देशन दिने अन्य व्यक्तिहरूको पनि खोजी गरिरहेको जनाएको छ ।
जापानमा पछिल्ला वर्षहरूमा सामाजिक सञ्जालमार्फत आपराधिक समूहले किशोरहरूलाई प्रयोग गरेर गराइने ‘यामी बाइटो’ (रातको पार्टटाइम काम) सम्बन्धी अपराध बढ्दो चिन्ताको विषय बनेको छ । प्रहरीले यस घटनाको सम्बन्ध पनि त्यस्ता संगठित आपराधिक सञ्जालसँग हुनसक्ने आशंकामा अनुसन्धान अघि बढाएको छ ।
प्रतिक्रिया राख्नुहोस्