नेपाली राष्ट्रिय क्रिकेट टोलीका उपकप्तान तथा टी–२० अन्तर्राष्ट्रिय टोलीका कप्तान दीपेन्द्र सिंह ऐरी १०० टी–२० अन्तर्राष्ट्रिय खेल खेल्ने पहिलो नेपाली खेलाडी बनेका छन् ।
सन् २०२३ मा चीनको हाङ्जाउमा सम्पन्न एसियाली खेलकुदअन्तर्गत पुरुष क्रिकेट छनोटको फाइनलमा सोमबार हङकङविरुद्ध मैदानमा उत्रिएसँगै उनले यो कोशेढुंगा पार गरेका हुन् ।
उनीपछि सर्वाधिक खेल खेल्ने सूचीमा सोमपाल कामी ९१ खेलसहित दोस्रो स्थानमा छन् भने करण केसी ९० खेलसहित तेस्रो स्थानमा छन् ।
दीपेन्द्रले सन् २०१८ मा लर्ड्समा नेदरल्यान्ड्सविरुद्धको खेलमार्फत नेपाल राष्ट्रिय क्रिकेट टोली का लागि टी–२० अन्तर्राष्ट्रिय डेब्यू गरेका थिए ।
उनले १०० खेलमा १ शतक र १२ अर्धशतकसहित २ हजार २१३ रन बनाएका छन् भने ६२ विकेट पनि लिएका छन् । आजको खेलमा गरेको प्रदर्शन भने यस तथ्याङ्कमा थपिन बाँकी छ ।
हाल उनी आईसीसी टी–२०आई अलराउन्डर वरियतामा पाँचौं स्थानमा रहेका छन् र यसअघि दोस्रो स्थानसम्म पुगिसकेका थिए ।
लामो समय उपकप्तानको जिम्मेवारी सम्हालेका दीपेन्द्रलाई केही समयअघि मात्र टी–२० अन्तर्राष्ट्रिय टोलीको कप्तान नियुक्त गरिएको हो ।
कीर्तिमान र उपलब्धि
दीपेन्द्रले नेपाली क्रिकेटमा थुप्रै कीर्तिमान बनाएका छन् । उनले ९ बलमै अर्धशतक पूरा गर्ने कीर्तिमान बनाएका छन्, जुन अहिलेसम्म नतोडिएको र बराबरी मात्र हुन सक्ने रेकर्ड हो । साथै, उनले एकै ओभरमा ६ छक्का प्रहार गर्ने कीर्तिमान पनि बनाएका छन् ।
सन् २०२३ सेप्टेम्बरमा चीनको हाङ्जाउमा मंगोलियाविरुद्धको खेलमा उनले ९ बलमा ८ छक्का प्रहार गर्दै ५० रन पूरा गरेका थिए । त्यस्तै, सन् २०२४ को एसीसी प्रिमियर कपमा कतारविरुद्ध एकै ओभरमा ६ छक्का प्रहार गरेका थिए ।
दीपेन्द्रले यू–१९ स्तरमा पनि नेपालका लागि कप्तानी गरेका थिए । उनको नेतृत्वमा नेपालले यू–१९ एसिया कपमा भारतलाई पराजित गरेको थियो ।
घरेलु तथा फ्रेन्चाइज क्रिकेटमा पनि सफल रहेका उनले धनगढी प्रिमियर लिग (डीपीएल), नेपाल टी–२० लिग, राष्ट्रिय खेलकुद तथा प्रधानमन्त्री कपजस्ता प्रतियोगितामा उपाधि दिलाउन योगदान दिएका छन् ।
प्रतिक्रिया राख्नुहोस्