बिपी राजमार्गअन्तर्गत बनेपा–रोशी खण्डको बुच्चाकोट नजिक पर्ने सेल्फी डाँडामा शुक्रबार दिउँसो यात्रुवाहक बस दुर्घटना हुँदा पाँचजनाको मृत्यु भएको छ भने दर्जनौं यात्रु घाइते भएका छन्।
प्रारम्भिक जानकारी अनुसार बनेपाबाट रोशी गाउँपालिकाको सुँगुरेतर्फ जाँदै गरेको बा ३ ख ८३९८ नम्बरको बस अनियन्त्रित भई सडकबाट खस्दा दुर्घटना भएको हो। दुर्घटनापछि बसमा सवार यात्रुहरू ठूलो संख्यामा हताहत भएको आशंका गरिएको छ।
स्थानीयवासी, प्रहरी र उद्धार टोली घटनास्थलमा पुगेर घाइतेहरूको उद्धार कार्य जारी राखेका छन्। घाइतेहरूलाई नजिकका स्वास्थ्य संस्थाहरू र काभ्रे तथा आसपासका अस्पतालतर्फ उपचारका लागि पठाइएको छ। केहीको अवस्था गम्भीर रहेको बताइएको छ।
दुर्घटनापछि उक्त खण्डमा केही समय यातायात अवरुद्ध भएको छ भने सुरक्षाकर्मीले सडक खुलाउने र थप उद्धार कार्यलाई सहज बनाउन प्रयास गरिरहेका छन्।
प्रहरीले घटनाको कारणबारे प्रारम्भिक अनुसन्धान सुरु गरेको छ। तीव्र मोड र भिरालो सडक रहेको उक्त क्षेत्रमा ब्रेक फेल वा चालकको नियन्त्रण गुम्नुलाई सम्भावित कारणका रूपमा हेरिएको भए पनि यकिन कारण भने अनुसन्धानपछि मात्र स्पष्ट हुने जनाइएको छ।
स्थानीय प्रशासनले मृतक तथा घाइतेहरूको पहिचान प्रक्रिया अघि बढाएको छ भने थप विवरण आउन बाँकी रहेको जनाएको छ।
प्रतिक्रिया राख्नुहोस्