परराष्ट्र मन्त्रालयले प्रधानमन्त्री वालेन्द्र शाहका प्रमुख सल्लाहकार कुमार वेनको भारत भ्रमणका विषयमा अनभिज्ञता प्रकट गरेको छ । प्रधानमन्त्री शाहका सल्लाहकार वेन सुटुक्क भारत गएको भन्दै समाचारहरु सार्वजनिक भएका छन् ।
शुक्रबार परराष्ट्र मन्त्रालयमा आयोजित नियमित पत्रकार सम्मेलनमा सहसचिव एवं प्रवक्ता लोकबहादुर पौडेल क्षेत्री पत्रकारहरुले वेनको भारत भ्रमणका विषयमा राखेका जिज्ञासामा अनभिज्ञता प्रकट गर्नुभएको हो ।
त्यस क्रममा प्रवक्ता क्षेत्रीले सरकारले सबै मित्रराष्ट्रहरूसँगको सम्बन्धलाई प्रगाढ तुल्याउँदै आवश्यकता अनुसार उच्चस्तरीय भ्रमणलाई पनि निरन्तरता दिने । प्रचलित कूटनीतिक अभ्यास बमोजिम सरकारले उच्चस्तरीय भ्रमणको तयारी गरिरहेको जानकारी दिनुभयो ।
यसै गरी उहाँले राष्ट्रिय स्वतन्त्र पार्टी -रास्वपा)को अनुरोधका आधारमा सभापति रवि लामिछानेको चीन भ्रमणको सहजीकरण गर्न परराष्ट्र मन्त्रालय तयार रहेको उल्लेख गर्दै सबै भ्रमणहरू कूटनीतिक आधारमा सम्पन्न हुने बताउनुभयो ।
उहाँले भन्नुभयो, “राजनीतिक दलहरूबीच हुने भ्रमण वा आदानप्रदान सम्बन्धित दलहरूको विषय हो । त्यस्तो भ्रमणका लागि परराष्ट्र मन्त्रालयको समन्वय वा कूटनीतिक सहजीकरण आवश्यक पर्ने अवस्था आएमा सम्बन्धित राजनीतिक दलको अनुरोधका आधारमा मन्त्रालयले आवश्यक सहजीकरण गर्नेछ ।”
उहाँले सांस्कृतिक कूटनीति हरेक देशको कूटनीतिक अभ्यासको महत्त्वपूर्ण पक्ष भएको उल्लेख गर्दै यसलाई अझ प्रभावकारी र सुदृढ बनाउने नीति सरकारले लिएको जानकारी समेत दिनुभयो ।
प्रतिक्रिया राख्नुहोस्