जेलमा रहेका पाकिस्तानका पूर्वप्रधानमन्त्री इमरान खानको रिहाइ माग गर्दै उनको पार्टी पाकिस्तान तहरीक–ए–इन्साफ (पीटीआई) का समर्थकले इस्लामाबादतर्फ लामो मार्च सुरु गरेका छन् ।
सरकार र विपक्षीबीच भएको वार्ता सहमतिमा पुग्न नसकेपछि आइतबार खैबर पख्तुनख्वाबाट मार्च सुरु गरिएको हो । पीटीआईका अनुसार पाँच हजारभन्दा बढी समर्थक ट्रक, बस तथा निजी सवारीसाधनसहित मार्चमा सहभागी छन् ।
खैबर पख्तुनख्वाका मुख्यमन्त्री तथा इमरान खानका समर्थक सोहेल अफ्रिदीले लक्की मारवतबाट मार्चको नेतृत्व गर्नुभएको छ । मार्चमा सहभागी हुनेहरूका लागि बाटोमा विभिन्न स्थानमा रात बिताउने व्यवस्था गरिएको छ ।
लक्की मारवतबाट सुरु भएको टोली करक, कोहाट, पेशावर र चर्सद्दातर्फ अघि बढ्दै अक्टोबर ८ मा खैराबाद पुग्ने योजना छ । त्यसपछि इस्लामाबादतर्फको अर्को चरणबारे निर्णय गरिने पीटीआईले जनाएको छ ।
सरकार र पीटीआईबीच वार्ता असफल
मार्च रोक्ने प्रयासस्वरूप सङ्घीय सरकार र पीटीआईबीच वार्ता भए पनि सहमति हुन सकेन । तीन चरणमा भएको वार्तामा इमरान खानको रिहाइ, उनलाई अस्पतालमा स्थानान्तरण, परिवार तथा चिकित्सकलाई भेट्न दिने व्यवस्था र प्रदर्शन स्थगनलगायत विषयमा मतभेद देखिएको थियो ।
पाकिस्तानका गृहमन्त्री मोहसिन नक्वीले वार्ता असफल हुनुमा खैबर पख्तुनख्वाका मुख्यमन्त्री अफ्रिदीलाई जिम्मेवार ठहर गर्दै मार्चका क्रममा कुनै मानवीय क्षति भए त्यसको जिम्मेवारी उहाँले लिनुपर्ने चेतावनी दिनुभएको छ । सरकारले प्रदर्शनकारीलाई इस्लामाबाद प्रवेश गर्न नदिने स्पष्ट गरेको छ ।
पीटीआईले भने सरकारसँगको वार्ता असफल हुनुमा केन्द्र सरकारले खैबर पख्तुनख्वामा सञ्चालन गर्न खोजेको सुरक्षा तथा आतङ्कवादविरोधी कारबाहीको जिम्मेवारी प्रदेश सरकारलाई लिन दबाब दिएको दाबी गरेको छ ।
इस्लामाबादमा सुरक्षा कडा
मार्च राजधानी प्रवेश गर्ने सम्भावनालाई ध्यानमा राख्दै सरकारले इस्लामाबाद प्रवेश गर्ने सडकमा कन्टेनर राखेर अवरोध सिर्जना गरेको छ । राजधानीको संवेदनशील क्षेत्र तथा प्रमुख सडकमा सुरक्षा व्यवस्था पनि कडा पारिएको छ ।
यसअघि पनि खानका समर्थकको प्रदर्शन हिंसात्मक बनेका कारण सरकारले सम्भावित झडप रोक्न ठूलो संख्यामा सुरक्षाकर्मी परिचालन गरेको छ ।
सरकारले पछिल्लो समय पाकिस्तानको उत्तरपश्चिमी क्षेत्रमा पाकिस्तानी तालिवान (टीटीपी) का सशस्त्र गतिविधि बढेको भन्दै अहिले ठूलो राजनीतिक प्रदर्शन गर्नु सुरक्षाका दृष्टिले जोखिमपूर्ण हुने बताएको छ । सरकारको आरोपलाई पीटीआईले अस्वीकार गर्दै आएको छ ।
इमरान खानको रिहाइ मुख्य माग
पीटीआई समर्थकले इमरान खानलाई जेलबाट तत्काल रिहा गर्नुपर्ने मुख्य माग राखेका छन् । त्यसबाहेक उनलाई अस्पतालमा स्थानान्तरण गरी उपचारको व्यवस्था गर्नुपर्ने तथा परिवारलाई भेटघाटको सहज व्यवस्था गर्नुपर्ने माग पनि उनीहरूको छ ।
इमरान खान सन् २०२३ देखि जेलमा हुनुहुन्छ । भ्रष्टाचारलगायत विभिन्न मुद्दामा उहाँलाई दोषी ठहर गरिएको भए पनि खान र पीटीआईले ती मुद्दा राजनीतिक उद्देश्यबाट प्रेरित भएको दाबी गर्दै आएका छन् । सरकारी पक्षले भने आरोपहरू कानुनी प्रक्रियाअन्तर्गत रहेको बताउँदै आएको छ ।
पूर्वक्रिकेट खेलाडी खान सन् २०१८ मा पाकिस्तानको प्रधानमन्त्री बन्नुभएको थियो । संसद्मा अविश्वासको प्रस्ताव पारित भएपछि अप्रिल २०२२ मा उहाँ पदबाट हट्नुभएको थियो ।
सन् २०२४ को आमनिर्वाचनमा पीटीआई समर्थित उम्मेदवारहरूले उल्लेख्य सफलता हासिल गरे पनि निर्वाचनमा धाँधली भएको खानको पार्टीले आरोप लगाएको थियो । सरकारले भने उक्त आरोप अस्वीकार गर्दै आएको छ ।
खान जेलमा रहे पनि उहाँको राजनीतिक प्रभाव र समर्थक आधार कमजोर नभएको पीटीआईको दाबी छ । पछिल्लो लामो मार्चले पाकिस्तानमा लामो समयदेखि जारी राजनीतिक तनावलाई पुनः सडकमा ल्याएको छ ।
वार्ता असफल भएपछि सुरु भएको आन्दोलन राजधानीसम्म पुग्ने क्रममा सरकार र पीटीआईबीचको टकराव थप बढ्न सक्ने देखिएको छ ।
प्रतिक्रिया राख्नुहोस्