जेनजी आन्दोलनको अभिमत अनुसार आज सम्पन्न निर्वाचनमा अपेक्षाकृत कम मतदान भएको पाइएको छ । मतदान सम्पन्न भएपछि निर्वाचन आयोगले दिएको तथ्यांक अनुसार अपेक्षाकृत कम मतदान भएको पाइएको हो ।
निर्वाचन सम्पन्न भएपछि आयोगमा आयोजित पत्रकार सम्मेलनमा आयोगका कार्यबाहक प्रमुख आयुक्त रामप्रसाद भण्डारीले प्रारम्भिक चरणमा करिब ६० प्रतिशत मतदान भएको प्रारम्भिक अनुमान गरेको जानकारी दिनुभयो ।
उहाँले विस्तृत विवरण सङ्कलन जारी रहेको पनि बताउनुभयो । स्मरण रहोस् वि.सं. २०७९ को आम निर्वाचनमाा करिब ६२ प्रतिशत मतदान भएको थियो ।
पत्रकार सम्मेलनमा भण्डारीले छिटपुट घटनाबाहेक देशभर शान्तिपूर्ण र उत्साहपूर्वक सम्पन्न भएको राष्ट्रिय र अन्तरराष्ट्रिय पर्यवेक्षक संस्थाहरुको प्रारम्भिक प्रतिवेदनले जनाएको उल्लेख गर्नुभयो ।
दुर्गम १५ जिल्लाका मतपेटिका नेपाली सेनाको हेलिकप्टरबाट सङ्कलन गरिने जनाउँदै कार्यबाहक प्रमुख भण्डारीले मतपेटिका सङ्कलन भएपछि मतगणना तत्काल सुरु गरिने जानकारी दिनुभयो ।
उहाँका अनुसार ताप्लेजुङ, रसुवा, दोलखा र रुकुमपूर्वमा मतपेटिका आजै र सङ्खुवासभा, सोलुखुम्बु, मनाङ, हुम्ला, रुकुमपश्चिम र बाजुराका मतपेटिका शुक्रबारसम्म हेलिकप्टरबाट सङ्कलन गरिनेछ ।
आयोगले मताधिकारबाट प्रतिनिधि चुन्ने र शासन सत्ता सञ्चालनको प्रक्रियालाई पूर्णता दिने अभियानमा सहभागी र सहयोगी सबैलाई धन्यवाद दिएको छ ।
कतिपय स्थलमा मतदाताले मतदानमा सहभागी हुन अस्वीकार गरेको सन्दर्भमा कार्यबाहक प्रमुख आयुक्त भण्डारीले सरकार वा जनप्रतिनिधिले गरेका प्रतिबद्धता पूरा नहुँदा कतिपय स्थानमा मतदाताले मत नदिएको हुनसक्ने भएकाले ती मतदाताले संविधान, प्रणाली र आयोगप्रति भने असन्तुष्टि नभएको बताउनुभयो ।
प्रतिक्रिया राख्नुहोस्