गोरखाको चुमनुब्री गाउँपालिका–६ मा पहिरो खसेर थुनिएको बूढीगण्डकी नदी खुलेपछि आएको लेदो र गेग्रानसहितको आकस्मिक बाढीले तटीय बस्तीमा ठूलो क्षति पुर्याएको छ।
बाढी प्रभावित क्षेत्रमा नेपाली सेनाको उद्धार टोली पुगेको छ भने जोखिममा रहेका बासिन्दालाई सुरक्षित स्थानमा सार्ने काम भइरहेको छ।
नेपाली सेनाको जनसम्पर्क तथा सूचना निर्देशनालयका अनुसार खोज तथा उद्धारका लागि सेनाको टोली हवाई तथा स्थलमार्गबाट परिचालन गरिएको छ।
काठमाडौँमा रहेको कम्पोजिट क्विक रेस्पोन्स टिमसमेत हवाईमार्गबाट प्रभावित क्षेत्रमा पुगेको छ। सेनाको टोलीले पहिरोको जोखिममा रहेको जगत् गाउँबाट छ जनाको हवाई उद्धार गरेको छ।
चुमनुब्री गाउँपालिकाकी उपाध्यक्ष लक्ष्मी गुरुङका अनुसार बाढीले पैयू र बगर गाउँका ३५ घर बगाएको छ। दोभान, घट्टेखोला, जगत् र सल्लेरीलगायतका बस्तीमा पनि व्यापक क्षति पुगेको छ। बाढीले चुमनुब्री गाउँपालिका–३ का बजार क्षेत्रका संरचनामा समेत क्षति पुर्याएको उहाँले बताउनुभएको छ।
बाढीले सल्लेरीस्थित निर्माणाधीन बूढीगण्डकी जलविद्युत् आयोजनाको क्याम्प भवन तथा सोती र मान्बु जोड्ने मोटरेबल पुल बगाएको विवरण प्राप्त भएको छ। माछीखोला जोड्ने पुलसहित अन्य झोलुङ्गे पुलमा पनि क्षति पुगेको स्थानीय सञ्चारमाध्यमले जनाएका छन्।
उङ्गिलुङ खोलाबाट आएको बाढीका कारण खोला किनारका चारवटा गोठ र त्यहाँ बाँधिएका १५ वटा याक तथा नाकसमेत बगेको विवरण छ।
पशुको हेरचाहमा रहेका चार जना गोठाला सम्पर्कविहीन भएको सहायक प्रमुख जिल्ला अधिकारी नेत्रप्रसाद शर्मालाई उद्धृत गर्दै रेडियो नेपालले जनाएको छ। केही स्थानीय विवरणमा गोठालाको संख्या फरक उल्लेख भएकाले यसबारे थप पुष्टि हुन बाँकी छ।
बाढीको जोखिम बढेपछि आरुघाट बजारसमेत खाली गराइएको छ। प्रहरीले सिर्दिबास, धार्चे गाउँपालिकाका खोर्लाबेँसी, माछाखोला, सोती, आर्खेत र आरुघाट क्षेत्रका बासिन्दालाई सुरक्षित स्थानमा जान आग्रह गरेको छ।
गृहमन्त्री सुधन गुरुङले घटनालगत्तै नेपाल प्रहरी, सशस्त्र प्रहरी बल र स्थानीय प्रशासनलाई उद्धार, राहत तथा प्रभावितलाई सुरक्षित स्थानमा स्थानान्तरण गर्न परिचालन गरिएको जानकारी दिनुभएको छ।
उद्धार कार्यका लागि हेलिकोप्टरसमेत परिचालन गरिएको छ। उहाँले बूढीगण्डकी नदी किनारका बासिन्दालाई तत्काल सुरक्षित स्थानमा जान र उच्च सतर्कता अपनाउन आग्रह गर्नुभएको छ।
प्रारम्भिक विवरणअनुसार चुमनुब्री गाउँपालिका–६ को लोक्पा र चुम्लिङबीच ठूलो पहिरो खसेपछि नदी थुनिएको थियो। आइतबार बिहान नदी थुनिएको सूचना पाएपछि प्रहरी टोली घटनास्थलतर्फ खटिएको र बिहान करिब ६ः१५ बजेदेखि थुनिएको स्थानबाट पानी बग्न थालेपछि ठूलो बाढी आएको प्रहरीले जनाएको छ।
बाढीले पुर्याएको क्षतिको विस्तृत विवरण संकलन भइरहेको छ। पछिल्ला विवरणमा नदीको बहाव र थुनिने अवस्था फेरि परिवर्तन हुन सक्ने जनाइएको छ। त्यसैले नदी तटीय क्षेत्रका बासिन्दालाई आधिकारिक सूचना पालना गर्न, नदी किनारमा नजान र सुरक्षित उच्च स्थानमा बस्न आग्रह गरिएको छ।
हालसम्म मानवीय क्षतिको आधिकारिक पुष्टि भएको छैन। तर केही गोठाला सम्पर्कविहीन भएको विवरण आएकाले खोजी तथा उद्धार कार्य जारी छ।
बूढीगण्डकी बाढी : सोती र माछीखोलाका पुल बगायो, चार जनाको अवस्था अज्ञात
बाढी प्रभावितको उद्धारमा हेलिकोप्टरसहित सुरक्षाकर्मी परिचालन, सतर्क रहन गृहमन्त्रीको आग्रह
बूढीगण्डकीमा भोटेकोशीकै झल्को दिने बाढी, आरुघाटसम्म सतर्कता
बाढी प्रभावितको उद्धारमा हेलिकोप्टरसहित सुरक्षाकर्मी परिचालन, सतर्क रहन गृहमन्त्रीको आग्रह
प्रतिक्रिया राख्नुहोस्