अमेरिकी राष्ट्रपति डोनाल्ड ट्रम्पले सोमबार इजरायली प्रधानमन्त्री बेन्जामिन नेतान्याहूलाई इरानसँग अमेरिकाले गर्ने कुनै पनि सम्झौता स्वीकार गर्न “अरू विकल्प नहुने” बताउनुभएको छ ।
फाइनान्सियल टाइम्ससँगको टेलिफोन अन्तर्वार्तामा ट्रम्पले भन्नुभयो, “उनीसँग कुनै विकल्प हुनेछैन। आदेश म दिन्छु, सबै आदेश म दिन्छु। उनी (नेतान्याहू) निर्णय गर्ने हैसियतमा छैनन्।”
उहाँका अनुसार इरानद्वारा गरिएको पछिल्लो आक्रमणले अमेरिका–इरान वार्तामा कुनै असर पार्ने छैन। “यसले सम्झौतामा कुनै प्रभाव पार्दैन ।”
युद्धविराम उल्लंघनपछि नयाँ तनाव
ट्रम्पको टिप्पणी इरानले इजरायलतर्फ ब्यालेस्टिक मिसाइल प्रहार गरेपछि आएको हो। यो घटना गत अप्रिलको सुरुमा भएको युद्धविरामपछि सबैभन्दा गम्भीर उल्लंघन मानिएको छ।
सोही दिन इजरायली प्रधानमन्त्री नेतान्याहूले ट्रम्पसँग फोनवार्ता गरेको अमेरिकी अधिकारीहरूलाई उद्धृत गर्दै समाचार संस्था एक्सियोसले जनाएको छ। ट्रम्पले नेतान्याहूलाई इरानमाथि प्रतिकार नगर्न सुझाव दिएको पनि रिपोर्टमा उल्लेख छ।
इरानले सोमबार इजरायलतर्फ मिसाइल प्रहार गरेको थियो, जुन अप्रिल ८ को युद्धविरामपछि पहिलो प्रत्यक्ष मिसाइल आक्रमण हो।
इजरायलमा सतर्कता, आकाशीय रक्षा प्रणाली सक्रिय
इजरायल डिफेन्स फोर्स (आइडीई) का अनुसार इरानबाट मिसाइल प्रहार भएको जानकारीपछि देशका विभिन्न क्षेत्रमा साइरन बजाइएको थियो।
आइडीईले विज्ञप्तिमा भनेको छ, “इरानबाट मिसाइल प्रक्षेपण गरिएको पहिचान भएको छ। आकाशीय रक्षा प्रणालीले खतरालाई रोक्न काम गरिरहेको छ।”
इजरायली एयर फोर्सले पनि मिसाइलहरू अवरोध गर्न रक्षा प्रणाली सक्रिय गरिएको र नागरिकलाई सुरक्षित स्थानमा रहन निर्देशन दिइएको जनाएको छ।
अधिकारीहरूले मोबाइल फोनमार्फत आपतकालीन सूचना पठाउँदै सुरक्षित स्थानमा बस्न र अर्को सूचना नआएसम्म बाहिर ननिस्कन आग्रह गरेका छन्। हालसम्म आक्रमणबाट कुनै मानवीय क्षति वा ठूलो भौतिक क्षति भएको रिपोर्ट आएको छैन।
लेबनानमा पनि तनाव
यसैबीच, आइतबार इजरायलले लेबनानको दाहियाह क्षेत्रस्थित हिज्बुल्लाहको मुख्यालयमा आक्रमण गरेको थियो। यो आक्रमण हिज्बुल्लाहले इजरायलतर्फ प्रहार गरेपछि गरिएको बताइएको छ।
प्रतिक्रिया राख्नुहोस्