फ्रान्सको राजधानी पेरिसमा ३१ वर्षपछि पहिलोपटक परम्परागत जापानी खेल सुमोको प्रदर्शनी प्रतियोगिता सुरु भएको छ। शनिबारदेखि सुरु भएको दुईदिने ग्रान्ड सुमो भ्रमणले फ्रान्सेली दर्शक तथा सुमोप्रेमीहरूलाई उत्साहित बनाएको छ।
पेरिसमा यसअघि सन् १९९५ मा ग्रान्ड सुमो भ्रमण आयोजना गरिएको थियो। त्यसयता तीन दशकभन्दा बढी समयपछि सुमो फेरि फ्रान्स पुगेको हो।
जापानको सांस्कृतिक पहिचानका रूपमा स्थापित सुमो पछिल्ला वर्षहरूमा युरोपसहित विश्वका विभिन्न मुलुकमा लोकप्रिय बन्दै गएको छ। यही लोकप्रियतालाई थप विस्तार गर्ने उद्देश्यले जापान सुमो संघले विदेश भ्रमण कार्यक्रम सञ्चालन गर्दै आएको छ।
यसपटकको पेरिस प्रदर्शनीमा शीर्ष डिभिजनका ४१ जना पहलवान सहभागी छन्। प्रतियोगिता सुरु हुनुअघि जापान सुमो संघका अध्यक्ष हक्काकु तथा खेलाडीसहित करिब ८० जनाले प्रतियोगिता स्थल बाहिर सामूहिक तस्वीर खिचाएका थिए।
आफ्ना मनपर्ने पहलवानहरूको नाम अंकित तौलिया बोकेर उपस्थित भएका समर्थकहरूले उनीहरूलाई उत्साहपूर्वक स्वागत गरेका थिए।
प्रतियोगिता सुरु भएसँगै रंगशालामा उत्साहको माहोल छाएको थियो। पहिलो दिनको अन्तिम प्रतिस्पर्धामा ओजेकी (दोस्रो उच्च वरीयता) का पहलवान कोटोजाकुराले किरिशिमालाई पराजित गरेपछि दर्शकदीर्घि ताली र हुटिङले गुञ्जिएको थियो।
पेरिसका ३२ वर्षीय एक दर्शकले पहिलोपटक प्रत्यक्ष सुमो हेर्ने अवसर पाउँदा निकै उत्साहित भएको बताए। उनका अनुसार प्रारम्भमा सुमोका परम्परागत संस्कार र विधिले आकर्षित गरे पनि खेलाडीहरूको शक्ति र विविध दाउपेचले अझ बढी प्रभावित बनायो।
स्विडेनबाट आएका ५१ वर्षीय एक समर्थकले उरालाई आफ्नो मनपर्ने पहलवान भएको बताउँदै दोस्रो दिनको प्रतिस्पर्धा पनि हेर्ने र निकट भविष्यमा जापानको टोकियो पुगेर प्रत्यक्ष सुमो अवलोकन गर्ने इच्छा व्यक्त गरे।
पेरिसमा आयोजित यो प्रतियोगिताले जापानी परम्परागत खेल सुमोको अन्तर्राष्ट्रिय आकर्षण बढ्दै गएको संकेत गरेको छ। सुमो अब केवल जापानको सांस्कृतिक सम्पदा मात्र नभई विश्व खेल संस्कृतिको साझा सम्पदाका रूपमा विस्तार हुँदै गएको देखिन्छ।
प्रतिक्रिया राख्नुहोस्